Nakaawiden itay Disiembre 19 ni Overseas Filipino worker (OFW) Gelienor “Jimmy” Pacheco iti Filipinas, a kinautibo ti grupo a Hamas idi Oktubre 7, ken nawayawayaan idi Nobiembre 24.
Dagiti pamilia ni Pacheco ti nangsabet kenkuana iti Ninoy Aquino International Airport (NAIA) Terminal 1, a pakairamanan ti asawa, 3 nga annak, ken ti inana; kasta met dagiti opisial ti Department of Migrant Workers (DMW), Overseas Workers Welfare Administration (OWWA), ken ni Embahador ti Israel iti Filipinas Ilan Fluss.
Naragsak ni Pacheco ta nakita ken nakadennana manen ti pamiliana, ngem iti laksid ti napasaranna, kayatna latta ti agsubli iti Israel tapno maipaayna dagiti kasapulan ti pamiliana.
Impanamnama ti gobierno ti Filipinas a maipayaan iti scholarship dagiti tallo nga annak ni Pacheco, ken ti tulong iti pamiliana. (Joseph Pedrajas/Manila Bulletin//Lito Hilidon/Bannawag)
