Inanamongan ti Siudad ti Vatican itay Disiembre 18 a mabalin a bendisionan ti Katoliko a padi dagiti agaasmang nga agpada a lallaki wenno agpada a babbai, no la ket saan daytoy a paset ti ritual ti Simbaan iti panagkasar wenno civil wedding.
Iti dokumento nga inaprobaran ni Santo Papa Francis, sinuportaran ti Vatican ti pannakabendision dagiti di gagangay nga agaasmang (agraman dagiti agdendenna a di nagkasar wenno nagdiborsio) ken dagiti agaasmang nga agpada ti katataoda.
Segun iti dokumento, di rumbeng a malapdan wenno pawilan ti kinasinged ti Simbaan kadagiti tattao iti amin a kasasaad a kasapulanda ti tulong ti Dios babaen ti simple a panangbendision.
Nupay kasta, saan a nabaliwan ti takder ti Iglesia Katolika iti panagdenna wenno panagkallaysa dagiti agpada ti katataoda. Iti sabali a pannao, saan a mabalin a kasaren ti Simbaan ti lalaki ken lalaki wenno ti babai ken babai.
Manipud Kadagiti Agdama a Kameng ti Bannawag: Dios ti Agngina!
Inyunay-unay daytoy ti nabayagen a pammati ti Simbaan a ti panagkasar ket maipaay laeng iti lalaki ken babai, tapno maaddaanda iti annak.
Daytoy ti umuna a gundaway a winayaan ti Vatican ti pannakabendision dagiti agaasmang nga agpada a lalaki wenno agpada a babai, idinto a daytoy ti maysa a dakkel a pagsusupiatan iti uneg ti Iglesia Katolika.
Sinupiat dagiti konserbatibo a padi a Katoliko, nangruna iti Estados Unidos, ti impaulog ti Vatican.
Nupay kasta, addan dagiti Katoliko a papadi iti dadduma a lugar ti mangar-aramid iti daytoy, kas iti Belgium ken Germany.
Segun ken ni James Martin, maysa a padi a Jesuit iti Estados Unidos ken nalatak a mangitantandudo kadagiti LGBTQ, ti nairuar a dokumento ti maysa a dakkel nga addang nga agturong iti ministerio ti simbaan kadagiti kameng ti LGBTQ.
Tapno maawan ti ania man a pannakariro, inlawlawag ti dokumento a napauluan, "Fiducia Supplicans -- On the Pastoral Meaning of Blessings," a saan a maitutop ti panangbendision no maigiddan wenno maisilpo iti sibil a panagkasar, ken no maaramat dagiti kawes, tignay, wenno sao a maus-usar iti aktual a ritual ti Simbaan iti panagkasar.
Ti kastoy a panangbendision, maipaay met iti dadduma pay a situasion kas iti panangsarungkar iti simbaan, pannakisarita iti maysa a padi, panagkararag kas maysa a gunglo, wenno bayat iti narelihiosuan a panagdaliasat. (Agence France-Presse/Manila Bulletin//Lito Hilidon/Bannawag)
