Dandani kagudua a trilion ti gatad ti nailatang a pondo manipud iti PhP5.768-trilion a 2024 General Appropriations Bill (GAB), nga agpaay kadagiti marigrigat a Filipino.
Kinuna ni House Speaker Martin Romualdez itay Disiembre 19 a maited ti PhP500-bilion a pondo iti 48-milion a marigrigat a Filipino iti entero a pagilian.
Imbatad ni Romualdez nga inyusuat ti Kongreso ti baro a programa iti GAB a napanaganan iti AKAP (Ayuda sa Kapos ang Kita) nga addaan iti pondo a PhP60-bilion tapno maikkan iti one-time cash assistance a PhP5,000 dagiti pamilia a PhP23,000 agpababa ti binulan a matgedanda. 12 a milion a pamilia ti matulongan daytoy a pakairamanan dagiti adda iti pabrika, konstruksion, drayber, service crew, ken dagiti kaarngida.
Agtultuloy a maikkan iti pondo dagtii programa ti gobierno para kadagiti marigrigat, kas iti Assistance to Individuals in Crisis Situation (AICS) a programa ti Department of Social Welfare and Development (DSWD) a naikkan iti PhP23-bilion; ken ti Tulong Pang-hanapbuhay sa Ating Disadvantage/Displaced Workers (TUPAD) a programa ti Department of Labor and Employment (DOLE) nga addaan iti PhP30-bilion a pondo.
Manipud Kadagiti Agdama a Kameng ti Bannawag: Dios ti Agngina!
PhP5-bilion ti nailatang a suporta dagiti mannalon kas iti libre a padanum, bukbukel, ganagan, ken dadduma pay nga aramaten iti panagtalon.
PhP80-milion ti pondo ti National Irrigation Administration (NIA) tapno maipatakder dagiti programa daytoy a dam, pagurnongan ti danum (water reservoir) ken solar irrigation system.
Adda PhP1-bilion a pondo ti UP-Philippine General Hospital, PhP1.5-bilion para iti National Kidney and Transplant Institute, PhP1-bilion para iti Philippine Cancer Center, PhP1-bilion para iti Philippine Children’s Medical Center, PhP1-bilion para iti Bicol Regional Medical Center, ken PhP500-milion ti nailatang iti Batangas Regional Medical Center.
Kinuna ni Romualdez a sapay koma ta maipaay ti gobierno ti kasapulan a tulong dagiti tattao tapno malasatanda ti narikut a panawen.
Manamnama a pirmaanen ni Presidente Marcos ti 2024 GAB ita nga aldaw (Disiembre 20). (Ellson Quismorio/Manila Bulletin//Lito Hilidon/Bannawag)
