Salaysay ni MARLYN GARCIA-DEL ROSARIO
INKAKAUBINGAK met ti agbasbasa iti Bannawag. No aldaw ti Domingo, segseggaanmin ti isangpet ni Tiong Peping a gatangenna idiay Candon. Saanna a maliwayan ti gumatang iti linawas a bilang ti Bannawag. Gumatgatang met ni inangmi idi ngem manmano laeng gapu iti kinakirang ti kuarta. Isu a ti Bannawag a gatangen ti ulitegmi, pagbibinnulodan ti innem a pamilia ket pagangayanna, nasinasinanton ti dadduma a panidna inton agsubli kenkuana.
Napateg ti Bannawag kaniak, kadakami nga agkakabsat, ken agkakasinsin ta isu ti umuna a nagsursuruanmi nga agbasa. Isu a naalistokami a bumasa uray addakami pay laeng idi iti umuna a grado iti elementaria. Aglulubbonkami iti karison nga agbasa sakaminto agpapapaggaak no adda mabasami a nakakatkatawa. Agasem man dayta mamaymaysa a Bannawag a mamagkayammet iti sangapamilia!
Adda pay gundaway nga uray la masilmutan ti kidayko iti apuy ti lampara gapu ta nakapaklebak a makibasbasa kada inang ken tatang. Uray la maksetanen ‘tay lutlutuen ta nakamaymayat ti panagbasan. No dadduma, ibagak a mapanak idiay kasilias ngem ilibasko nga alaen ‘ta Bannawag ta idiayak nga agbasa.
Iti panagasawak, naisardengko ti agbasa iti Bannawag ta awan makitkitak a lako a Bannawag iti ili a nakaikamangak. Ngem no agawidak idiay lugarmi, agbirokak ti basaek a Bannawag. Uray daanen, anusak a pagsasarunuen dagiti bilang ken panidna.
TURISMO: Intayon Idiay Ayuyang Garden iti Pila, Siudad ti Laoag!
Agingga a nagbaliw ti kurikulum ti Department of Education (DepEd). Narugian ti K-12 Curriculum, a pakausaran ti Mother Tongue (Ilokano) a pagisuro. Iti dayta a panawen, arigna appokokon dagiti isurok. Ditoy a nagsinnubliankami iti Bannawag. Ket makuna a kasla “sweeter the second time around,” kas pagsasao, ti napasamak.
Nabirokak ti Bannawag iti maysa a news stand iti Villasis Bagsakan (public/farmers’market) iti ilimi a Villasis, Pangasinan. Apay a Bannawag? Daytoy ti ipakitak ken ipabasak kadagiti adalak nga ubbing. Nasayud ti Ilokano ti Bannawag. Idinto a ‘tay naited a material a basaen dagiti ubing, diak mapagsusurot ti nakulkol a pannaka-Ilokano-na.
Nagputarak ngarud kadagiti daniw ken istoria a maitutop nga isuro kadagiti ubbing. Nagsuratak iti Bannawag iti benneg a “Ti Makunami,” a sinungbatan met a dagus ni Sir Cles Rambaud, managing editor ti Bannawag, nga urayek ti pannakaipablaakna.
Anian a ragsakko idi naipablaak ti sinuratko! Kaslaak ubing a naukkoran iti nalaga a bulong ti niog ta diak pay ketdin nagawidan ti riknak nga impabasa iti maysa a kalugaranmi nga adda idi iti Bagsakan apaman a nabasak ti naganko iti umuna a naipablaakko.
Gapu iti naipablaakko, natukay ti riknak a mangipatulod iti daniw a para ubbing nga isursurok idin kadagiti ubbingko. Kaasi ni Apo Dios, naipablaak ti umuna a daniwko a para ubbing.
Ad-addan nga impategko ti Bannawag. Nangruna la ngarud idi nairamanak, kas writing fellow, iti Pasnaan 5 literary workshop a naangay idiay Gonzaga, Cagayan. Diak ipagarup a makitak, ken makadennak dagiti basbasaek la idi ti naganda a mamaingel a mannurat. Maysa daydi Apo Juan S. P. Hidalgo Jr kadagiti nagpaay a panelist iti nasao a workshop.
Nagipatulodak ngarud pay iti dandaniw ken ni Apo Ariel S. Tabag a poetry editor ti Bannawag nga uray adda panagduaduak, nagipalapalak latta. Pagyamyamanak la unay ta nakapasa ken naipablaak dagitoy a dandaniw ken diak ninamnama a nakaurnongak met gayam babaen ti Bannawag.
Sapay ta agtultuloy iti panagdur-as ti Bannawag a mangitandudo ken mangsalimetmet iti nakayanakantayo a pagsasao. --O
Magatang ti Bannawag kadagiti sukiyo nga aglaklako iti pagiwarnak ken magasin.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
Isip pabaknangen, Bannawag ti basaen!
