Nasurok a 25-milion a Filipino ti marigatan a makagatang iti nasken a kasapulanda, kas iti taraon, gapu iti di umdas a matgedanda, segun iti Philippine Statistics Authority (PSA) ita, Disiembre 22.
Maibatay iti 2023 First Semester Official Poverty Statistics ti PSA, 22.4 a porsiento laeng ti populasion ti pagilian (katupag ti 25.24-milion a Filipino) ti saan a makagatang iti kangrunaan a taraon ken di taraon a kasapulan iti umuna nga innem a bulan ti 2023.
Manipud iti Enero aginga iti Hunio 2023, maibilang a nakurapay ti pamilia nga addaan iti 5 a kameng ken nababbaba ngem PhP13,797 ti binulan a matgedanda, a kasapulan tapno magatangda dagiti nasken a kasapulanda.
Iti sabali a bangir, mapan a 8.7 a porsiento (katupag ti 9.79-milion a Filipino) ti saanda a kabaelan a gatangen uray ti kangrunaan laeng a taraon.
Manipud Kadagiti Agdama a Kameng ti Bannawag: Dios ti Agngina!
Agarup 16.4 a porsiento dagiti pamilia (agdagup iti 4.51 a milion) ti mangibilang iti bagida a kas nakurapay iti umuna nga 6 a bulan ti 2023; idinto a 5.9 a porsiento (wenno 1.62-milion a pamilia) ti nakasagrap iti kinakirang iti makan iti isu met laeng a tiempo. (Manila Bulletin//Lito Hilidon/Bannawag)
