Binallaagan ti Department of Information and Communications Technology (DICT) itay Disiembre 21 ti publiko maipapan iti mainaig-Paskua nga online scam.
Kinuna ni DICT Assistant Secretary ken Spokesperson Renato Paraiso nga agannad ken agridam koma ti publiko idinto a natural kadagiti Filipino ti agbalin a naparabur iti panawen ti Paskua.
Impagunamgunam ni Paraiso nga adda iskam a website ken patalastas a nairanta a mangallilaw kadagiti biktimaenda babaen ti panangiturong daytoy iti maysa a website nga agpampamarang a lehitimo nga online a pagtagilakuan.
Innayon ni Paraiso a gumatang laeng kadagiti mapagtalkan a website kas iti Shopee, Lazada, ken dadduma pay nga online a pagtagilakuan a taltalken ti DICT.
Manipud Kadagiti Agdama a Kameng ti Bannawag: Dios ti Agngina!
Nangted ni Paraiso iti maysa nga ehemplo ti taktika nga us-usaren dagiti iskamer kas iti panangiturongda iti tao a mang-klik iti maysa a link nga agdawat iti personal nga impormasion.
Kinuna ni Paraiso a liklikan koma dagitoy nga agdawat iti impormasion, idinto a mangidiayada iti diskwento wenno paw-it tapno tapno ited ti biktima ti impormasionna.
Iti gandat ti gobierno a maparmek dagiti online iskam iti panawen ti Paskua, palpaligapan ti DICT ti publiko kadagiti nadumaduma a wagas nga us-usaren dagiti iskamer a pangallilaw babaen ti impaskilda a "12 'scams’ of Christmas" iti DICT website.
Makitintinnulong ti DICT kadagiti nadumaduma nga ahensia ti gobierno, nangruna kadagiti panakabagi ti linteg kas iti Philippine National Police (PNP) ken ti National Bureau of Investigation (NBI), babaen ti Department of Justice (DOJ). (Sonny Daanoy/Manila Bulletin//Lito Hilidon/Bannawag)
