Saan nga inanamongan ni Presidente Ferdinand Marcos Jr. ti dua a paset ti 2024 General Appropriations Act (GAA) mainaig iti revolving fund ti Department of Justice (DOJ) ken ti pannakaipatungpal ti National Government's Career Executive Service Development Program.
Iti surat ni Presidente Marcos ken ni House Speaker Martin Romualdez, inlawlawag ti Presidente a dina anamongan ti DOJ Revolving Fund ta di maiparbeng a mangipasdek ti DOJ iti "revolving fund." Innayonna a maibatay iti pangngeddeng ti Korte Suprema, saan a maikanatad iti linteg pannakapaadda daytoy ket masapul a marisut babaen ti sabali a gakat.
Saan pay nga inanamongan ni Presidente Marcos ti Section 38 ti "Implementation of National Government's Career Executive Service Development Program (NGCESDP)” ta awan ti pakainaigan daytoy iti ania man a nailatang iti 2024 GAA.
Dinakamat ni Presidente Marcos ti Presidential Decree (PD) No. 336 a nangikeddeng iti nagbedngan dagiti annongen ti Career Executive Service Board (CESB) a kas mangituray iti Career Executive Service (CES) ken ti Development Academy of the Philippines a kas mangisagana ken mangipatungpal iti programa ti CES.
TURISMO: Intayon Idiay Ayuyang Garden iti Pila, Siudad ti Laoag!
Pinirmaan ni Presidente Marcos ti Republic Act (RA) No. 11975 (wenno ti 2024 GAA) itay Disiembre 20. (Argyll Cyrus Geducos/Manila Bulletin/Lito Hilidon/Bannawag)
