Binilin ni Philippine National Police (PNP) chief Gen. Benjamin Acorda itay Disiembre 3 dagiti amin a kameng ti polisia iti rehion a papigsaenda ti panagtignay kontra iti cybercrime.
Panggep ti PNP a mapasayaat pat ti kabaelanda a mangsaranget iti daytoy a kita ti krimen a maar-aramid iti internet a kas iti scamming.
Kinuna ni Acorda a nupay adda rimmang-ayan ti kabaelan ti Anti-Cybercrime Group (ACG) ti PNP babaen ti panangsanayda, ken pananggun-odda kadagiti moderno a ramit, masapul a maan-anay ti kabaelanda, saan laeng a tapno mabantayan ken masolbar dagiti kaso ti cybercrime, no di pay ket tapno agtalek ti publiko iti kabaelan ti PNP a mangsaranget iti daytoy.
Iti umuna a 8 a bulan ti 2023, 16,297 a kaso ti cybercrime ti pinalutpot ti ACG.
Manipud Kadagiti Agdama a Kameng ti Bannawag: Dios ti Agngina!
Nayetnag ti 19 a warrant tapno agsapul, mangala ken mangadal iti datos ti kompiuter; idinto a 214 a warrant of arrest ti naipaulog; 140 nga entrapment operation ti naiwayat, ken nangipaay iti teknikal a tulong iti 24 a kaso nga im-imbestigaren dagiti dadduma nga ahensia.
Agdagup iti 397 a katao ti natiliw, ken 4,092 ti natulongan a biktima ti cybercrime bayat ti operasion maibusor iti human trafficking.
Iti maudi nga uppat a bulan ti 2023, napaliiw ti ACG a bimmaba ti bilang dagiti kaso ti cybercrime.
Agdagup iti 4,362 a kaso ti cybercrime ti naireport manipud iti Septiembre agingga iti Disiembre; idinto nga adda 5,607 a kaso ti cybercrime idi 2022.
Patien ni Acorda a napimpintas ketdi ti nagapuanan ti PNP iti 2023 wenno iti napalabas a tawen. (Christopher Lloyd Caliwan/PNA/Lito Hilidon/Bannawag)
