Naluktanen ti maikadua a tawen ti pasalip ti panagsuratan iti ababa a sarita babaen ti Apolonio-Iloretara Awards for Ilokano Literature (AIAFIL). Panggep daytoy a pasalip ti mangparang-ay ken mangpadur-as iti pagsasao nga Ilokano babaen dagiti sarita dagiti mannurat nga Ilokano.
Manayonan ti bilang dagiti mangabak ita a tawen: innem, manipud iti lima a napadayawan iti umuna a tawen ti AIAFIL. Kas pammadayaw iti pimmusay a kamannuratan ken nangabak (maikatlo a gunggona) iti napalabas a salip , maawagan ti umuna a gunggona iti Virgilio D. Domaloy Top Prize.
Isponsoran daytoy da Guillermo I. Iloreta ken Jefferson A. Apolonio. Taga-Sinait, Ilocos Sur ngem nabayagen iti Sacramento, California, U.S.A. ni Iloreta idinto a taga-Vigan, Ilocos Sur ngem agnaeden iti Gaitherburg, Maryland ni Apolonio. Agpaay a Secretariat ni Delfin P. Dumayas, agdama a drama scriptwriter iti Luvlet Artist and Talent Center iti Bombo Radyo Philippines.
Ti kompleto a pagannurotan ti salip.
1. Iti daytoy maikadua tawen ti salip, eksperimental a wagas ti pannakasurat ti sarita ti mapagsasalipan.
2. Nangrugi ti salip idi Hunio 1, 2023 ket agpatingga inton Enero 15, 2024.
3. Silulukat ti salip kadagiti amin a mannurat nga Ilokano.
4. Maysa laeng a sarita ti mabalin nga isalip ti tunggal mannurat.
5. Nasken nga orihinal, di pay naipablaak (mairamanen ditoy ti social media) wenno naadaw iti aniaman a sinurat ti isalip. Masapul a bukod a putar ti autor ti pakisalipna. Saanton a mapalubosan a makisalip kadagiti sumarsaruno a pasalip ti Apolonio-Iloreta Awards for Ilokano Literature ti aglabsing iti daytoy a pagannurotan.
6. Agatiddog ti pakisalip a sarita iti 15-30 a panid iti layout a pakaaramatan ti Microsoft Word document format a Bookman Old Style a font size 12, doble espasio ken addaan ti one inch margin iti tunggal bakrang, normal size wenno letter size a 8.5 x 11. Nasken met a naka-portable document format (PDF) ti pakisalip.
7. Ti paulo laeng ti sarita ti ilanad; saan nga agusar iti pudno wenno parbo a nagan a pakabigbigan ti mannurat. Ipatulod ti pakisalip babaen ti email. Mangipatulod met iti pakasaritaan ti autor (bionote) iti sabali a file. Ilanad iti nasao a file dagitoy: paulo ti pakisalip, nagan, adres, ken numero ti selpon ti auhor, kaudian a ladawan, sa ti bionote.
8. Ipatulod a kas attachment ti entry wenno pakisalip (umuna a file) agraman ti bionote (maikadua a file) iti daytoy nga email address: [email protected]. Ilanad met iti subject ti email ti: Pakisalip, Ababa a Sarita. Masapul a maawat ti Secretariat dagiti entry iti di naladladaw ngem Enero15, 2024. Saan a mairaman iti salip ti entry a maawat kalpasan ti 11:59 PM iti Enero 15, 2024.
9. Estrikto ti pannakaipatungpal amin nga alagaden daytoy a salip. Dagiti Gunggona: Virgilio D. Domaloy Top Prize, 12,000.00; Maikadua, 8,000.00; Maikatlo, 6,000.00; Maikapat, 4,000.00; Maikalima, 3,000.00; Maikanem, 2,000. Malaksid iti gunggona a kuarta, maipaayan pay dagiti mangabak iti sertipiko ti pammadayaw.
10. Saan a mabalusingsing ti pangngeddeng dagiti hurado. Saan met a manayonan ti kaadu dagiti mangabak ngem karbengan ketdi dagiti isponsor wenno dagiti hurado ti mangkissay iti bilang no ipagarupda a saan a makapatar iti pagrukodan ti experimental short story dagiti naisalip a sarita.
11. Makipagtagikua ti Apolonio-Iloreta Awards for Ilokano Literature kadagiti mangabak a sarita nupay agtalinaed kadagiti autor ti copyright. Adda karbengan dagiti agpasalip a mangipablaak kadagiti mangabak a sarita iti pilida a magasin ken iti pannakailibro dagitoy.
Maiwaragawagto dagiti mangabak babaen ti Facebook Live ti Secretariat. Mapadayawan dagiti mangabak inton Marso wenno Abril 2024. Mapakaammuanto dagiti nangabak a mannurat ti eksakto a petsa ken lugar a pakaangayan ti pammadayaw.
Magatang ti Bannawag kadagiti sukiyo nga aglaklako iti pagiwarnak ken magasin.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
Isip pabaknangen, Bannawag ti basaen!
