Daniw ni AMADO I. YORO
ala wen, kamannurat, ala wen
piliem dagiti naulimek a darikmat ta yuritmo latta
a di agsarday pampanunot a sikogen
ti agtultultuloy a pannakatennebmo
a mangbukel kadagiti binatog iti isursuratmo
nga obra maestra.
no iladawam ti agsapa, isuda dagiti namnama
dagiti riniwriw a panagbaringkuas ken panagbaniaga
ti sirmata a kumalatkat iti aldaw
iti panagtindek ti init!
agtigtig-ab ti literatura
agtigtigerger ti pulso ti init
iti pitik ti pagorasan…
no iladawam ti agligsay nga init
kadagiti agalus-os a malem
mayarigda kadagiti maluom a bulong
a mangbirok iti pagiddaanda a barukong ti daga
kaatagda ti maysa a kinapudno
ti saan a matawaran a panagbiag
ti saan a maigawid a panagsalog ti pigsa
ta saanen a kas idi pay ti kinaagtutubo
ken kinaagkabannuag a panawen
5 a Daniw
ngem ita, padasem a biroken ti laminam
iti kuadro a pakaimarkaam iti agnanayon
ta maymaysa ti malem, nupay iti kinapudno
a maulit-ulit iti ilelelennek, ket ulit-ulitem met
ti agikur-it kadagiti bukbuklem a magnum opus
ta awanto koma iti pagbabawyam
a saan a nangusat iti bukodmo a dana ken pakasaritaan
a saan la ketdi a dagiti ubbaw a panagrarit.
mangngegmonto man ken saanmonton a mangngeg
ti areng-eng ti kuerdas ti rung-o a kutibeng
iti sidiran ti kampanario wenno sidiran
dagiti disso napnuan pakasaritaan: iti Ilocos,
iti Kailokuan, iti Ilokandia, iti ballasiw
ti riniwriw a milia iti ngatuen ti di agtalna
a sibibiag a danum a nakalawlawa a taaw
iti ngatuen dagiti matukantukad a bantay, tanap, taytay-ak.
agkikitatayto pay wenno saantayton nga agkikita
uray payen dagiti umel a komunikasion
wenno dagiti nabiag a facebook
kadagiti kabaddungalan, kadagiti kakontemporaneo
dagiti pada nga agig-iggem iti pluma
kadagiti pada nga agraem kadagiti urit
nabukbukarto la ketdi dagiti masangal a binatog
binatog ti biag, biag ken ray-aw
ray-aw ken sanaang, saem ken katawa
uray dagiti adu a panagsangit
uray dagiti adu a litania ti panaglulualo
iti di agressat a panagdawdawat.
ta adda latta saem, dagiti panagsuek wenno panagdur-as
ket iti pakabuklan, dagiti sirmata
no agsasaraktayo pay iti maysa a panawen
iti agmaymaysa a pagduyosan, iti agmaymaysa a panagem…
agyamanak, agyamanka: dagitoy ti bunga ti kinasaldet
adtoy ti sabong, adtoy ti palma, adtoy ti laurel
kas met daytoy ti naamo a kalapati
daytoy ti kappia, dagiti masungbatan nga ar-araraw
kas iti panagsubli ti init.
Magatang ti Bannawag kadagiti sukiyo nga aglaklako iti pagiwarnak ken magasin.
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
Isip pabaknangen, Bannawag ti basaen!
