Epistolario para ken ni Leah-Bannawag

Daniw ni AURELIO S. AGCAOILI

Denggenta man ti sagawisiw ni amang
   kalpasan ti padayana iti labus
   nga altar
Allingagenta man dagiti gantil panagarapaap
   kalpasan pananguros, panagamen
   iti orasion a naliputan
Kantaenta man dagiti matina ti ayat
   iti kopita ken lapida
   kalpasan umuna a pannakaitublakta
Biagenta manen dagiti inlansa a kasaba
   tapno umbi ti allukoy
   arakupen ti barukong ti lubong
Tapno ita kunaenta: padayata ti padaya
   ni amang
Tapno ita kantaenta: arakta ti arak-sardam
   no riingennata ti kopita
Tapno ita akuenta: naganta ti naisurat
   iti lapida ni lam-ek ken buteng
   tapno bay-anta a lapunosen ni karit ti kopita
   simsimanta sadiay ti dam-eg dagiti amin nga inna
riknaenta sadiay ti gantil dagiti amin
   nga ama a napukaw kadagiti altar
   ken kasaba
Agriingta para kadagiti gundaway
   a data ti birbiroken dagiti ubbog
   a data ti mangpanaw kadagiti isu met laeng
   a gundaway
   tapno dagiti dios apalanda dagiti tugotta
Rumidepta manen a kasingin ti nakem
   umangesta a kasingin ni patay
   tapno matuntonta ti biag.

Naipablaak iti Abril 1, 1985 a bilang ti Bannawag.

Magatang ti Bannawag kadagiti sukiyo nga aglaklako iti pagiwarnak ken magasin.

Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.