Indagadag ti Alliance of Concerned Teachers (ACT) iti Department of Education (DepEd) itay Enero 13 nga isardeng daytoy ti eksperimental a "Matatag Curriculum," ket ipanna ti atension iti panangsierto iti nainget ken nasaknap a pannakaiinnuman kadagiti maseknan.
Kalpasan nga impalnaad ti DepEd nga agsanay manen dagiti mannursuro para iti damo a pannakaipatungpal ti Matatag Curriculum inton sumaruno a tawen ti panageskuela, kinuna ni ACT Chairperson Vladimer Quetua a saan latta a nagnakem ti DepEd, ken itultuloy laeng daytoy ti di panagballigi ti K-12 Curriculum.
Binabalawna ti DepEd gapu iti panangipapilit daytoy iti nabaliwan nga "enhanced basic education curriculum," idinto a kurang daytoy iti silulukat, demokratiko, ken napudpudno a konsultasion kadagiti mannursuro ken dadduma pay a maseknan iti edukasion.
Segun iti ACT, saan a nangiwayat ti DepEd iti komprehensibo a panangtingiting iti kalawa ken kauneg ti parikut ti panagsursuro iti pagilian. Gapu itoy, kinuna ti ACT nga usaren dagiti mannursuro ti wagasda tapno malasinda no makabasa, makasurat, wenno makatarus dagiti ubbing.
Manipud Kadagiti Agdama a Kameng ti Bannawag: Dios ti Agngina!
Kinuna ti ACT nga ipatungpal latta ti DepEd ti baro a kurikulum idinto a saan pay a narisut dagiti kangrunaan a parikut kas iti nakurang a siled-pagadalan, mannursuro, ken dagiti dadduma pay a mausar iti panangisuro ken panagsursuro.
Kinuna pay ni Quetua a saan nga agballigi ti ania man a gannuat a mangpasayaat iti kalidad ti edukasion ken mangtaming iti parikut ti panagsursuro no ti kurikulum ket saan a maitutop iti kasapulan dagiti agad-adal, no di maikankano ti kasasaad ken pannakairaman dagiti mannursuro iti panangbaliw ti kurikulum, ken no saan a maipaay dagiti kasapulan ti pamunganayan nga edukasion. (Merlina Hernando-Malipot/Manila Bulletin//Lito Hilidon/Bannawag)
