Saan nga ibilang ti gobierno a pangta ti New People's Army (NPA), ta saan idan a suportaran ti masa, segun iti National Security Council (NSC) itay Enero 15.
Kinuna daytoy ni NSC spokesperson Jonathan Malaya kalpasan ti panangideklarar ni Presidente Ferdinand Marcos Jr. nga awanen ti aktibo a puersa ti NPA iti pagilian.
Nupay kasta, adda pay 13 a "kimmapuy" a gamat, wenno dagitay naawanen ti suportar iti masa, gapu iti panagtignay dagiti kameng ti Armed Forces of the Philippines (AFP) ken ti tulong nga ipapaay ti gobierno.
Maibatay iti datos ti AFP, 76 kadagiti 89 a grupo dagiti rebelde ti rinippuog ti militar idi 2023.
TURISMO: Intayon Idiay Ayuyang Garden iti Pila, Siudad ti Laoag!
Agdagup iti 1,399 a kameng ti komunista ken lokal a grupo dagiti terorista ti naparmek, idinto a 1,751 a paltog ti nakautibo dagiti puersa ti gobierno.
Patien ni Malaya nga uray aguummong manen dagiti kimmapuy a grupo dagiti rebelde, marigatandan a mangpapigsa manen iti puersada kas iti damo, gapu iti ipupusay ti dauloda a ni Jose Ma. "Joma" Sison idi 2022.
Iti sabali a bangir, inlibak ti Communist Party of the Philippines (CPP) ti indeklarar ni Presidente Marcos, ket kinunana nga agbayag latta ti NPA iti labes ti panagakem ni Marcos ken ti pannakibiang ti Estados Unidos iti Filipinas.
Segun ken ni CPP spokesperson Marco Valbuena, adda aktibo a puersa ti NPA iti 14 a rehion iti entero a pagilian, ket nupay nagsagabada iti pannakapaay, saanda latta pay a naparmek. (Martin Sadongdong/Manila Bulletin//Lito Hilidon/Bannawag)
