Tapno marisut ti pannakalugi kalpasan ti panagaapit gapu iti adu unay nga apit a madaddadael met laeng, adda plano ti Department of Agriculture (DA) a mangipatakder iti ad-adu pay a pasilidad a kas iti pagidulinan kadagiti produkto nga agrupsa (cold storage).
Sinarungkaran ni DA Secretary Francisco Tiu Laurel, Jr. ti Food Terminal Inc. (FTI), maysa a pasdek iti Taguig, tapno mangidulin iti nabalor a produkto a kas iti repolio ken dadduma pay a prutas ken nateng tapno mapagpaut ti kabayag ti pannakaidulin dagitoy.
Ngem tapno mataming ti agdama a nalabes nga apit, binilin ni Laurel ti FTI a gumatang dagiti Kadiwa center kadagiti mannalon.
Iti sabali a bangir, impanamnama ti DA-Cordillera (DA-CAR) kadagiti mannalon a maikkanda iti tulong tapno masukatan ti pukawda iti nababa unay a presio ti nateng, babaen ti programa a Kadiwa on Wheels.
Manipud Kadagiti Agdama a Kameng ti Bannawag: Dios ti Agngina!
Sipud Enero, addan 40,000 a kilo ti repolio, wombok, ken dadduma pay a nateng ti nailako ti DA-CAR. (Gabriell Christel Galang/Manila Bulletin//Lito Hilidon/Bannawag)
