Inaklon ni Department of Agriculture (DA) Secretary Francisco Laurel Jr. nga awan ti pondo a nailatang tapno matulongan dagiti mannalon a nalugi gapu iti nalabes a suplay ken naibelleng a natnateng.
Iti panagtataripnog nga indauluan ni Presidente Ferdinand Marcos Jr. itay Enero 16, naisaludsod ken ni Laurel no ania ti tulong nga ipaay ti gobierno kadagiti mannalon a nalugi, ket inlawlawagna nga awan ti ayuda a kuarta a maited kadagiti mannalon idinto ta awan ti pondo a nailatang kadagitoy.
Segun ken ni Laurel, no adda kastoy a pasamak, mabalin nga idulin dagiti mannalon dagiti nasurok nga apitda iti cold storage, wenno gatangen ti gobierno dagitoy sa maited kadagiti Kadiwa center.
Nupay kasta, kinuna ni Laurel nga agsapsapulda iti pamuspusan tapno matulongan dagiti mannalon iti kastoy a situasion, idinto a saanna a patien a ti panangted iti ayuda a kuarta ti umno a wagas ti panangtulong kadakuada, ngem mangted ketdi iti bukbukel, ganagan, wenno sabali pay a ramit ti panagtalon. (Betheena Unite/Manila Bulletin//Lito Hilidon/Bannawag)
