Tapno maep-ep ti epekto ti El Niño phenomenon, nangilatang ti Department of Agriculture (DA) iti PhP250 a milion a pondo para iti proyekto a solar irrigation.
Segun ken ni DA Assistant Secretary Arnel De Mesa itay Enero 15, maipatungpal daytoy a proyekto ti ahensia ita a tawen, nupay kinunana a bassit pay daytoy a pondo, inanamaenna a mangipamuspusan ni Secretary Francisco “Kiko” Tiu Laurel Jr. tapno manayonan ti pondo ti irigasion.
Kinuna ni De Mesa a maipangpangruna a maipatakder ti solar irrigation kadagiti lugar a maapektaran ti El Niño, kas iti Lumaud a paset ti Luzon, ken iti dadduma a paset ti Amianan a Luzon.
Innayonna a rinugianen ti DA ti makiuman para iti Masagana Rice Industry Development Program (MRIDP) tapno mangsangal kadagiti wagas a mangep-ep iti epekto ti El Niño iti apit a pagay.
Manipud Kadagiti Agdama a Kameng ti Bannawag: Dios ti Agngina!
Segun iti datos ti DA, agpaut ti kalgaw manipud iti Disiembre agingga iti Mayo, ket kasapulan dagiti talon ti nayon a padanum idinto a kinunana a 5-litro a danum ti kasapulan tapno mapataud iti sangakilo a bagas.
Imbatad pay ti DA nga adda 275,000 nga ektaria a talon ti maapektaran ti El Niño, ngem mabalin a makissayan daytoy ta nangato ti danum kadagiti dadduma a dam a mangipapaay iti danum kadagiti taltalon. (Jel Santos/Manila Bulletin//Lito Hilidon/Bannawag)
