Nagyaman ti grupo dagiti mannursuro a Teachers’ Dignity Coalition (TDC) iti panangipangag ti Department of Education (DepEd) iti ilunglungalongda a pannakaisubli koma iti sigud a panangrugi ti klase, kas iti sakbay ti angol.
Kaduada dagiti dadduma nga opisial ti DepEd a nakiinnuman kadagiti dadduma pay a maseknan iti edukasion a naangay iti DepEd Central Office iti Siudad ti Pasig itay Enero 16.
Segun iti TDC, plano ti DepEd a leppasen ti agdama nga school year inton Mayo 31, imbes a Hunio 14, kas sagudayen ti DepEd Order No. 22, 2023, idinto a mangrugi ti school year 2024-2025 inton Hulio 29.
Ngem kinuna ni DepEd Spokesperson Michael Poa a lepleppasenda pay laeng ti Department Order (DO) para iti sumaruno nga school year, ket maipakaammonto daytoy inton idatagda ti Basic Education Report (BER) iti daytoy a bulan. (Merlina Hernando-Malipot/Manila Bulletin//Lito Hilidon/Bannawag)
