Inyusuat ni Presidente Ferdinand Marcos Jr. ti Pasig River Urban Development (PRUD) iti Siudad ti Manila itay Enero 17 a napanaganan iti "Pasig Bigyan Buhay Muli" (PBBM) kas sagudayen ti Executive Order (EO) No. 35, series of 2023 a nangbukel iti Inter-Agency Council ti PRUD (IAC-PRUD).
Panggep daytoy a proyekto a pagbalinen ti karayan a kas sentro ti panagtignay ti ekonomia, turismo, ken panangisilpo iti transportasion iti uneg ti kabesera. Iti kasta, mapasayaat ti kalidad ti panagbiag iti aglawlaw ti Karayan Pasig, agraman dagiti sangana, ken ti komunidad iti asidegna.
Indauluan da Presidente Marcos, First Lady Liza Araneta-Marcos, ken dagiti dadduma nga opisial ti gobierno ti inaugorasion ti "Pasig Bigyan Buhay Muli."
Kinuna ni Presidente Marcos a tarigagayanna nga isubli ti sigud a kasasaad ti Karayan Pasig -- sibibiag a karayan a mabalin a paglinglingayan, pagpasiaran, ken paglang-aban iti sadiwa nga angin iti siudad.
Manipud Kadagiti Agdama a Kameng ti Bannawag: Dios ti Agngina!
Paset ti plano ti IAC-PRUD nga idauluan ni Department of Human Settlements and Urban Development (DHSUD) Secretary Jose Rizalino Azucar ti pannakayakar dagiti 10,000 nga informal settler family (ISF) nga agindeg iti igid ti karayan.
Segun ken ni Acuzar, aggatad ti PhP18 a bilion ti nakuna a proyekto ngem aggapu kadagiti donasion ti pondo daytoy, ket saan nga iti gobierno. Manamnama a maileppas ti entero a proyekto iti las-ud ti 3 a tawen.
Kinuna ni Presidente Marcos nga arapaap ti gobierno a maaddaan iti dakkel nga akem ti Karayan Pasig iti panaggaraw ti ekonomia iti siudad a kas kadagiti dadakkel a siudad iti sangalubongan -- ti Thames River iti London, ti Chao Phraya iti Bangkok, ken ti Seine River iti Paris. (Betheena Unite/Manila Bulletin//Lito Hilidon/Bannawag)
