Kasapulan ti Filipinas ti gatad a PhP1.3-trilion tapno mapasayaat ti maapit a bagas, makissayan ti pannakaibelleng ti produkto ti agrikultura ken mapatalged ti suplay ti taraon iti pagilian, kinuna ni Department of Agriculture (DA) Secretary Francisco Tiu-Laurel Jr. itay Enero 17.
Segun ken ni Laurel, PhP1.2 a trilion ti kasapulan para iti padanum ti 1.2-milion nga ektaria ti taltalon a namulaan ti pagay.
Kinuna ni Laurel nga iti napalabas a 40 a tawen, awan ti pinonduan ti gobierno a pasilidad para iti panagapit, idinto a saggabassit, awan mamaayna, ken sayang laeng dagitoy.
Kinunana pay a masapul a maipatakder ti pasilidad nga aggatad iti PhP90 a bilion, kas iti pinagtipon a pagkiskisan ken pagidulinan ti bagas, tapno makissayan iti 15 a porsiento ti mapukaw a bagas gapu iti nakurang a pasilidad, idinto nga agbalor iti PhP10.7-bilion a bagas ti mainot.
Manipud Kadagiti Agdama a Kameng ti Bannawag: Dios ti Agngina!
Innayon pay ni Laurel a PhP1 a bilion ti nailatang ita a tawen para iti pannakaipatakder kadagiti 4 a cold storage -- kangrunaan iti Food Terminal Inc. (FTI) Complex iti Siudad ti Taguig -- tapno mataming ti parikut nga agsurok a suplay ken pannakaibelleng dagiti natnateng iti paset ti Luzon.
PhP5 a bilion pay ti kasapulan tapno mataming ti nakurang a pangidulinan kadagiti natnateng iti entero a pagilian.
Nupay agtultuloy latta ti DA a mangtulong, kinunana a dagiti local government unit (LGU) ti mangtaming iti agsursurok a suplay ti nateng ken nabalor nga apit. (Ma. Teresa Montemayor/PNA//Lito Hilidon/Bannawag)
