Inabsuelto ti Sandiganbayan 5th Division ni Senador Jose "Jinggoy" Estrada iti kasona a panagtakaw (plunder) mainaig iti makunkuna a pork barrel scam, gapu iti kinakurang ti pammaneknek.
Ngem iti 396-panid a desision met laeng ti Sandiganbayan, natakuatan daytoy a nagbasol ni Estrada iti panagpasuksok (bribery) gapu iti pannakayakar ti Priority Development Assistance Fund (PDAF) wenno pork barrel ni Estrada iti peke nga organisasion a kukua ni Janet Lim-Napoles.
Natakuatan ti Sandiganbayan a nakabasol ni Estrada iti panagpasuksok (direct bribery), ket nasentensiaan a maibalud iti 8 agingga 9 a tawen.
Nakabasol pay ni Estrada iti 2 a kaso ti saan a direkta a panagpasuksok (indirect bribery), ket nasentensiaan a maibalud iti las-ud ti 2 agingga 3 a tawen.
Manipud Kadagiti Agdama a Kameng ti Bannawag: Dios ti Agngina!
Malaksid kadagitoy, inkeddeng ti Sandiganbayan a masuspende pay ni Estrada nga agtakem iti gobierno, temporario a madiskualipikar iti kalinteganna nga agbotos, ken agmulta iti PhP3-milion.
Kinuna ni Atty. Alexis Abastillas-Suarez nga abogado ni Estrada a dakkel a balligi ti pannakaabsuelto ni Estrada iti kasona a plunder, ngem no maipapan iti kaso a panagpasuksok (bribery), nasken pay a basaenda ti desision ti Sandiganbayan tapno maadalda ti nagbatayan ti korte a nangipaulog iti sentensia.
Segun ken ni Estrada, binilinnan dagiti abogadona nga aramidenda amin a legal a pamuspusan nga agapelar iti Sandiganbayan wenno iti Korte Suprema. (Czarina Nicole Ong Ki/Manila Bulletin//Lito Hilidon/Bannawag)
