Impaulog ni Presidente Ferdinand Marcos Jr. itay Enero 18 ti Executive Order (EO) No. 52 a mangipasdek ken mangisaknap iti Pag-abot Program ti Department of Social Welfare and Development (DSWD) a mangsaranay kadagiti agindeg kadagiti kalsada ken dadduma pay a nakurapay nga agwalwalang kadagiti kalsada tapno agbalinda a produktibo a kameng ti gimong.
Ti Pag-abot Program ti maysa kadagiti baro a programa ti DSWD a mangipaay iti 9 a kita ti maipaay a tulong a kas iti transportasion wenno panagakar, tulong pinansial, temporario a pagtaengan, tulong iti pagbiagan, tulong iti panangala iti trabaho, agraman ti psychosocial a tulong, panangpabileg iti abilidad ti komunidad, panangpabileg iti kapasidad dagiti local government unit (LGU), ken tulong ti komunidad.
Maibatay iti EO, mabukel ti Inter-Agency Committee nga idauluan ti DSWD Secretary, idinto a ti daulo ti Department of Interior and Local Government (DILG) ti agpaay a bise.
Supsuportaran ti Filipinas ti kangrunaan a gandat ti United Nations Sustainable Development a masolusionan ti kinapanglaw babaen ti pannakaipatungpal dagiti umno a sistema tapno maipaay iti amin dagiti rekursos ti ekonomia nangruna kadagiti nakurapay a kameng ti gimong. (Argyll Cyrus Geducos/Manila Bulletin//Lito Hilidon/Bannawag)
