Impaulog ti National Telecommunications Commission (NTC) itay Enero 23 ti baro a cease and desist order (CDO) maibusor iti Sonshine Media Network International (SMNI), gapu iti panangsupring daytoy iti 30-aldaw a suspension a naipaulog idi Disiembre 2023.
Segun iti NTC, adda naawatda a report a nangipatangatang latta ti SMNI iti sumagmamano a lugar nupay naibilin a maipasardeng pay laeng daytoy idi Disiembre 27, 2023.
Daytoy a panangsalungasing ti namkuatan ti NTC a nangipaulog iti bilin a mangipaspasardeng iti SMNI a mangipatangatang iti programana iti amin nga estasion ti radio wenno telebision.
Kinuna ti NTC a nupay naikkan ti SMNI iti tiempo a mangidatag iti sungbat daytoy iti show cause order iti las-ud ti 15 nga aldaw, saan latta a nagtungpal ti SMNI, ngem nagkiddaw ketdi ti pannakailawlawag iti maipagarup a panaglabsing.
Manipud Kadagiti Agdama a Kameng ti Bannawag: Dios ti Agngina!
Iti CDO, kinuna ti NTC a maipasardeng ti operasion ti SMNI iti radio ken telebision bayat ti pannakaisayangkat ti kaso, nangruna ta saan pay a nangidatag ti SMNI iti surat kas sungbatna iti NTC mainaig iti alegasion a panaglabsing. (Rhowen Del Rosario/Manila Bulletin//Lito Hilidon/Bannawag)
