Maika-12 a Pasalip ALVIYA iti Sarita (2024), naluktan-Bannawag

Naluktanen ti Maika-12 a Pasalip ALVIYA iti Sarita (2024) ti Alex Vicente Yadao Literary Foundation, kas impakaammo ti Secretariat ti pasalip.

Tinawen nga is-isponsoran ni Alex V. Yadao, maysa a patron ti Literatura nga Ilokano a tubo ti Libertad, Abulug, Cagayan ngem agnanaeden iti New York City iti Estados Unidos, ti pannakaisayangkat ti Pasalip ALVIYA. Tartarawidwidan met daytoy ti project director-consultant a ni Dr. Freddie Pa. Masuli, tubo met laeng ti Libertad, Abulug, Cagayan ken agdama a mannursuro iti Cagayan State University, Sanchez Mira, Cagayan.

Dagiti pagalagadan ti pasalip:

Silulukat ti pasalip iti amin a mannurat nga Ilokano, propesional man wenno agdadamo, ken uray pay kadagiti saan nga Ilokano ngem makasurat iti pagsasao nga Ilokano.
Nawaya ti makisalip a mangpili iti ania man a tema a kayatna a suraten.
Agatiddog ti pakisalip iti 12-20 a panid iti short bond paper a size (8.5’ x 11’ wenno letter size a dokumento), nay-encode (agusar iti Times New Roman, font size 12) iti doble espasio ken addaan maysa a pulgada a margin iti amin nga igid ti dokumento.
Maysa laeng a sarita ti mapalubosan nga isalip ti kada mannurat a makisalip.
Nasken a bukod a putar ti autor ti maisalip, saan pay a naipablaak iti ania man a magasin wenno iti ania man a pablaakan a pakairamanan ti social media, ken saan a patarus manipud iti ania man a lengguahe.
Ti laeng parbo a nagan ti autor ti agparang iti manuskrito ti pakisalip a sarita. Mapakuyogan ketdi ti opisial nga entry iti maysa pay a dokumento a nakailanadan dagitoy: paulo ti sarita, parbo ken pudno a nagan, ken kabibiag ti autor agraman numero ti telepono a pakakontakan kenkuana.
Ipatulod dagiti dua a dokumento (sarita ken ti impormasion maipanggep iti autor) babaen ti elektroniko a wagas (e-mail) iti daytoy nga email account: [email protected].
Nasken a maipatulod iti Secretariat dagiti dua a dokumento iti saan a naladladaw ngem 11:59 PM ti Mayo 1, 2024 (oras iti Filipinas).
Ania man a pangngeddeng a mabukel dagiti hurado ket agtalinaed a kasta malaksid no maduktalan a nasalungasing ti Pagannurotan Bilang 5. Awananto metten ti autor iti gundaway ken pribilehio a makisalip pay kadagiti masungad a pasalip ti ALVIYA Literary Foundation.
Makipagtagikua ti ALVIYA Literary Foundation kadagiti mangabak a sarita nupay addaan latta iti karbengan dagiti autor iti copyright dagitoy. Maaddaan pay ti agpasalip iti karbengan a mangipablaak kadagiti mangabak a sarita iti ania man a wagas a kayatna nga aramaten a pakairamananen ti elektroniko ken tradisional a wagas ti panagipablaak.
Dagiti gunggona : First Prize – PhP20,000; Second Prize – PhP10,000; ken Third Prize – PhP7,000; ken dua a consolation prizes a sag-PhP4,000. Addanto met maited a sertipiko ti pammadayaw kadagiti mangabak.
Maiwaragawag dagiti mangabak a sarita iti maikadua a lawas ti Hunio 2024 ken mapadayawanto dagiti mangabak iti mapili pay laeng a lugar ken petsa iti bulan ti Hulio 2024.

Kas impasingked ti isponsor, agtultuloy ti Pasalip ALVIYA iti Sarita tapno marubroban ti regget nga agsurat ken maasa latta ti kabaelan dagiti mannurat nga Ilokano, propesional ken agdadamo, ket maputar dagiti piesa ti literatura a mangilamina iti biag, kabibiag, ken kultura ni Ilokano. (FPMasuli)

Magatang ti Bannawag kadagiti sukiyo nga aglaklako iti pagiwarnak ken magasin.

Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.

Mabalin pay a magatang ti Bannawag iti

Shopee: http://bit.ly/Bannawag-Shopee

Lazada: http://bit.ly/Bannawag-Lazada

Para iti digital a kopia:

PressReader: http://bit.ly/3n83kNQ

Magzter: http://bit.ly/407pazG

Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph

Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,

iti Instagram: https://www.instagram.com/bannawagmagazine

iti Twitter: https://twitter.com/BannawagMagasin

Facebook Page: https://www.facebook.com/BannawagMagasin

Facebook Public Group: https://www.facebook.com/groups/bannawag.magazine