Innem a Daniw-Bannawag

Ni HONOR BLANCO CABIE

1
aprosankay' koma nga ulep ngem
ania metten kinapaidamyo,
ay! ngem awan kaniak panangsemsem,
ketdi kaduaenkay' ampayagyo.

sadinno man ita 'tay papanan
daytoy riknak kiddawko a denggen:
kayatko dikay' a mayaw-awan,
di agbayag labsandakto manen.

iti sumuno nga aldaw ket siak
manen makitayonto 'ti baba,
makitayonto a 'toy karkarmak
isu pay lat' kaduak, isu latta.

kiddawko a bagkatendakami
nga agpasiar aldaw ken rabii.

2
uppatda nga addaan bayengyeng, ay!
lilliloda doroteo crispulo,
ay! ket uppatda met a musiko,
panagtokarda ta mangmurmuray.
maysa 'tay para baho ket maysa
'tay klarinete, kornetin met 'tay
maikatlo, maikapat 'ta trombone 'diay
kakinnulagtit met 'diay dilana.

no 'tay nalpas panagasistirdan
piesta ti ilida wenno daytay
semana santa no kuaresma ta
mangngegkot' ragragsakda't pagnaan.

idi riknak met 'tay maitagtag-ay --
ay! ngem maymaysan 'tay imbatida.

*wvbc (1925-1997: sousaphone);
ebc (1937-1997: clarinet)
fbc (1939-2018: trumpet)
hbc (trombone)

3
saibbek klarinete ken daydiay
agpakaasi a sainnek met
'diay biolin ta adda maisaluket
ditoy barukong a mangmurmuray.
ania ketdin panagdangdanggayda
'ti naulimek a rabrabii,
'ti notada adda daytay kari,
mangisiguro 'tay tag-ay rikna.

mayepyepyepak ket maturogak
koma tapno riknak ken mugingko
isuda 'tay umdas 'tay inana,
ngem 'diay danggayda ta irubodak.
daras bumangonak 'ti lubongko,
kaduak nakariing a karkarma.

4
o, bulanko,* saanka nga agliday
wenno daytay kuna nga agamak
pannagnam 'ti kasipngetan, ta siak
kaduanak a kenka kumallabay.
iti kasipngetan tangatang ta
siak 'tay gayyemmo a mangdanggay ti
panagwidawidmo 'ti rabii --
pudno, saanka nga agmaymaysa.

iti panagtangkayag ken iti
panagpalaudmo denggem kunak
ni minsan dikanto agmaymaysa,
daytat' linabagna daytoy kari.
ay! ngem no diakton maikari, ay! siak
'ton 'tay daras manglinteg 'ti dana.

*naretrato ita a rabii, oras 7.48, 12 nga
oras sakbay ti kabus iti martes: 7.48
am.

5
mariknak 'ta panagsekkadmo 'ti
inka panaglennek* 'diay laud, 'ta
irut panagkapetmo't sangsanga
saanmo pay kayat ti rabii.
dayta panagsekkadmo ta innak
mabasa nga adu pay la daytay
kayat nga aramiden--mangrayray
pagpagnaan ken mangparmek amak.

no bilang, init, ta masapulmo
daytoy adda numona a takiag
saanka nga agalumiim ta
sisasagana d'toy 'toy badangko.
kayatko, init, rakepem 'ta biag --
sisasaganaak no agunika.

*panaglennek init iti cainta ita
nga aldaw: 5.47. retrato naala
iti 4.16 pm.

6
agkakasinsinda mangun-unor
from HBC's The InComplete Sonnets
1
agkakasinsinda mangun-unor
'diay pagnaan, am-amin musiko--
lima--kaubinganda ni honor,
adda simbengda amin 'tanudko.

duat' de-padila* a makunkuna,
tallo** met de-bokilia, nagmayat
ur-urnosda't dana adda rimat
rikna ken muging guyugoyenda.

panagkukuyogda no rabii
ti piesta ken semana santa, ay!
pati panagitultulod napan
labes bantay isudat' maikari.

panagtokarda ta manglinglingay --
ngem 'diay kaubingan imbatidan.

*justiniano bz (tenor saxophone:
(9.6.1933-6.14.2012) lucas bz
(clarinet: 10.18.1936-8.11.1990).
**william valentin bc (sousaphone:
11.3.1925); florencio (trumpet: 10.9.
1939-jan 12,2018); hbc (trombone)

Magatang ti Bannawag kadagiti sukiyo nga aglaklako iti pagiwarnak ken magasin.

Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.

Mabalin pay a magatang ti Bannawag iti

Shopee: http://bit.ly/Bannawag-Shopee

Lazada: http://bit.ly/Bannawag-Lazada

Para iti digital a kopia:

PressReader: http://bit.ly/3n83kNQ

Magzter: http://bit.ly/407pazG

Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph

Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,

iti Instagram: https://www.instagram.com/bannawagmagazine

iti Twitter: https://twitter.com/BannawagMagasin

Facebook Page: https://www.facebook.com/BannawagMagasin

Facebook Public Group: https://www.facebook.com/groups/bannawag.magazine