Salaysay ni MELODY LAURETA AGUINALDO
SIPUD kinaubingko, ti Bannawag ti makitkitak a basbasaen ti adu a tattao iti lugarmi. Maysa ditan ni tatangko. Paginanaanna ti agbasa iti Bannawag no kasta a kagapgapuna iti taltalon. No nabasana aminen a linaon ti magasin, idissonan iti lamisaan. Sublatek met ket ukradek dagiti pinanidna. Kas maysa nga ubing, dagiti komiks ti pagay-ayatko a basbasaen. Makais-isem ni tatang a mangbuybuya kaniak ta iti tawenko a walo, nakatartarusen ti panagbasak nangruna iti Ilokano. Malaksid iti Bannawag, adda Ilokano a Biblia iti pagtaenganmi. Dagitoy ti ad-adda a nagsursuruak nga agbasa.
Iti panagbalasangko, saan a naawan ti panagayat ni tatang iti Bannawag. Pasaray siak ti dumaw-as a gumatang iti Bannawag iti malabsak nga aglaklako aggapuak iti eskuela. No dadduma, un-unaek ti agbasa kadagiti sarita ken salaysay sakbay a sanguek dagiti obra iti uneg ti balaymi. Magustuak unay dagiti mabasbasak ket kasla makaritak nga agsurat met iti sarita. Ngem diak masurotan no kasano a rugiak. No basbasaek dagiti sarita iti Bannawag, kasla makitkitak dagiti pasamak. No mamin-ano nga ulit-ulitek a basaen ti maysa a sarita no kasta a magustuak unay ti pannakaisarita wenno pannakasuratna. Inarapaapko a makasuratak met koma iti kas kapintas ti nabasak a sarita. Ken makaipablaakakto met koma iti Bannawag.
Idi naaddaanakon iti bukod a pamilia, tapno masaganaan ti panageskuela ti anakmi a maymaysa, pinadasko ti gasatko nga agtrabaho iti ballasiw ti taaw.
Idi a naam-ammok ti maysa a pagayam a nangiserrek kaniak iti gunglo dagiti agdandaniw nga Ilokano. Tapno adda met makuna a maibinglayko iti grupo, pinadasko ti agsuratsurat iti daniw—rinugiak nga inadal ti umno a panagsurat iti Ilokano tapno natartarus met laeng ti panagputarko iti daniw. Adu ti pakarigatak ngem inan-anusak . Kas iti panagusar kadagiti panilpo ken ispeling. Idi nasursurok bassiten ti grammar ken ortograpia ti pagsasao nga Ilokano, impamaysakon nga inad-adal ti panagdaniw a kaduak dagiti kagrupok.
Manipud Kadagiti Agdama a Kameng ti Bannawag: Dios ti Agngina!
Maragragsakanak no adda maileppasko a daniw a magustuan met dagiti editor ti grupomi. Ipaskilko met no kuan iti Facebook account-ko.
Pinadasko met ti nagipatulod iti benneg ti Daniw Para Ubbing ti Bannawag. Napagasatanak met ket anian a ragsakko idi rummuar ti daniwko iti Bannawag—iti kamaudiananna, natungpal met laengen ti arapaapko a makaipablaak iti inkakaubingak a binasbasa a magasin!
Adda met la nagbanagan ti panagpuypuyatko, intultuloyko latta ngarud ti nagsursurat iti daniw. Nagtultuloy ti panagiinnadalmi iti nakaikappengak a grupo. Adu a kameng ti nakaipablaak metten iti Bannawag ken dadduma pay a magasin.
Agingga a nabukel ti maysa a proyekto, ti panagilibro kadagiti sinuratmi. Impasnekko ngarud ti nagputar iti nadumaduma a tema. Kadagiti bakante nga orasko, gundawayak ti kinatalna ti panunotko a mangbukel iti daniw.
Nairuar ti umuna a libromi, ti “Apit, Antolohia dagiti Daniw nga Ilokano” idi 2021. Lalokami a rimmegget nga agsurat. Iti sumaruno a tawen, nairuar ti maikadua a libromi, ti "Subbual, Antolohia dagiti Daniw nga Ilokano.” Nagpaay dagitoy nga inspirasionko tapno lalo pay a gumagetak nga agsurat, nangruna iti daniw. Padaspadasek met ti agsurat iti sarita ngem siguro, saan pay a naan-anay ti naaadalko tapno makabukelak iti sarita, wenno uray salaysay. Masapul ngarud ti panagsursurok pay.
Ti maysa pay a pakaragsakak unay, immadu metten dagiti pagayamko lalo iti social media. Ditoy a naam-ammok, ken nagbalin payen a papagayamko, dagiti agkakalatak a mannurat a mabasbasak iti Bannawag. Isu nga uray no makuna a narigat, ken naliday, ti biag ti maysa nga agob-obra iti ballasiw-taaw a kas kaniak, nga adayo kadagiti ipatpategna iti biag ken iti nakayanakanna nga ili, naikagumaak ti nagan-anus ken agtalinaed a naragsak latta—kunaek a maysa ti Bannawag a bigbigek a tarabayko ken liwliwak, gapu iti karit ken inspirasion a ginubuayna kaniak sipud pay idi ubingak . Isu met nga itultuloyko latta ti agbasa iti Bannawag ken ti agsurat agingga a kabaelak. --O
TI AUTOR: Maikalima iti pito nga annak da Rosamilia R. Borja ken Oliviano R. Laureta (+). Naipasngay idi Septiembre 2, 1969 iti Bintawan Sur, Villaverde, Nueva Vizcaya. Iti Bintawan a nagelementaria. Idi agsekundaria, pinagadal dagiti ulitegna a taga-Paddad, Alicia, Isabela iti Philippine Union College, Northeast Luzon Campus ti Seventh Day Adventist Church iti Mabini, Alicia, Isabela. Inleppasna ti kurso nga Edukasion iti Philippine Normal University-North Luzon iti Aurora, Alicia, Isabela. Nakikallaysa ken ni Leopoldo T. Aguinaldo a taga-San Felipe, Ilagan, Isabela. Naaddaanda iti maysa a bunga, ni Lemuel Carl, a nagturpos iti BS Information Technology. Sakbay a bimmallasiw-taaw, nagobra iti Delfin Albano Memorial Institute of Technology iti San Mariano, Isabela. Nagpaay pay nga school registrar iti St. Joseph National High School iti Naguilian, Isabela.
Magatang ti Bannawag kadagiti sukiyo nga aglaklako iti pagiwarnak ken magasin.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
Isip pabaknangen, Bannawag ti basaen!
