Nayalud-od ti maudi nga aldaw ti panagidatag iti pakisalip iti Salip iti Sarita ti Apolonio-Iloreta Awards for Ilokano Literature (AIAFIL) iti Pebrero 29, 2024, segun iti Secretariat ti salip.
Panggep ti pasalip ti mangparang-ay ken mangpadur-as iti pagsasao nga Ilokano babaen dagiti sarita dagiti mannurat nga Ilokano wenno amin nga agsursurat a mangsu-usar iti pagsasao nga Ilokano.
Nanayonan ti bilang dagiti mangabak ita a tawen (2024): innem itan, manipud iti lima a napadayawan iti umuna a tawen ti AIAFIL. Kas pammadayaw iti pimmusay a kamannuratan ken nangabak (Maikatlo a Gunggona) iti AIAFIL iti napalabas a salip (2023), maawagan ti Umuna a Gunggona (ita a tawen) iti "Virgilio D. Domaloy Top Prize."
Isponsoran daytoy da Guillermo I. Iloreta ken Jefferson A. Apolonio. Taga-Sinait, Ilocos Sur ngem nabayagen nga agnanaed iti Sacramento, California, U.S.A. ni Iloreta; idinto a taga-Vigan Ilocos Sur ngem agnaeden iti Maryland, U.S.A. ni Apolonio. Agpaay a Secretariat ni Delfin P. Dumayas, drama scriptwriter iti Luvlet Artist and Talent Center iti Bombo Radyo Philippines.
Ti kompleto a pagannurotan ti salip:
- Iti daytoy maikadua a tawen ti salip, eksperimental a wagas ti pannakasurat ti sarita ti mapagsasalipan.
- Nangrugi ti salip idi Hunio 1, 2023 ket agpatingga (naiyalud-od) iti Pebrero 29, 2024.
- Silulukat ti salip kadagiti amin a mannurat nga Ilokano.
- Maysa laeng a sarita ti mabalin nga isalip ti tunggal mannurat.
- Nasken nga orihinal, di pay naipablaak (mairamanen ditoy ti social media) wenno naadaw iti ania man a sinurat ti isalip. Masapul a bukod a putar ti autor ti pakisalipna. Saanton a mapalubosan a makisalip kadagiti sumarsaruno a pasalip ti Apolonio-Iloreta Awards for Ilokano Literature ti aglabsing iti daytoy a pagannurotan.
- Agatiddog ti pakisalip a sarita iti 15-30 a panid iti layout a pakaaramatan ti Microsoft Word document format a Bookman Old Style a font, font size 12, doble espasio ken addaan iti 1 inch margin iti tunggal bakrang, iti normal size wenno letter size (8.5" x 11"). Nasken a maikombert iti portable document format (PDF) wenno naka-PDF ti document file ti pakisalip.
- Ti paulo laeng ti sarita ti ilanad iti pakisalip a sarita; saan nga agusar iti pudno wenno parbo a nagan a pakabigbigan ti autor. Ipatulod ti pakisalip babaen ti email. Mangipatulod met iti pakasaritaan ti autor (bionote) iti sabali a file, a nakailanadan dagitoy: paulo ti pakisalip, nagan, adres, numero ti selpon ti autor, kaudian a ladawan, ken ababa a pakasaritaan ti biag.
- Ipatulod a kas attachment ti pakisalip (umuna a file) agraman ti bionote (maikadua a file) iti daytoy nga email address: [email protected]. Ilanad met iti Subject ti "Pakisalip, Ababa a Sarita." Masapul a maawat ti Secretariat dagiti entry iti di naladladaw ngem Pebrero 29, 2024. Saan a mairaman iti salip ti entry a maawat kalpasan ti 11:59PM iti Pebrero 29, 2024. Istrikto ti pannakaipatungpal amin nga alagaden daytoy a salip.
- Dagiti Gunggona: Virgilio D. Domaloy Top Prize, PhP12,000; Maikadua, PhP8,000; Maikatlo, PhP6,000; Maikapat, PhP4,000; Maikalima, PhP3,000; ken Maikanem, PhP2,000. Malaksid iti gunggona a kuarta, maipaayan pay dagiti mangabak iti sertipiko ti pammadayaw.
- Saan a mabalusingsing ti pangngeddeng dagiti hurado. Saan met a manayonan ti kaadu dagiti mangabak ngem karbengan ketdi dagiti isponsor wenno dagiti hurado ti mangkissay iti bilang ti mangabak no saan a makapatar iti pagrukodanda iti experimental short story dagiti naisalip a sarita.
- Makipagtagikua ti Apolonio-Iloreta Awards for Ilokano Literature kadagiti mangabak a sarita nupay agtalinaed kadagiti autor ti copyright. Adda karbengan dagiti agpasalip a mangipablaak kadagiti mangabak a sarita iti pilida a magasin ken iti pannakailibro dagitoy.
- Maiwaragawagto dagiti mangabak babaen ti Facebook Live ti Secretariat. Mapadayawan dagiti mangabak iti maikatlo a lawas ti Mayo 2024. Mapakaammuanto dagiti nangabak iti eksakto a petsa ken lugar a pakaangayan ti pammadayaw.
Kadagiti nakaidatagen ti pakisalipda, mabalinyo pay nga editen tapno napimpintek sayo ipatulod manen. Ngem no patienyo a kapkapnekanyon, mairamanen dagitoy kadagiti kualipikado a naisalip. --O
Magatang ti Bannawag kadagiti sukiyo nga aglaklako iti pagiwarnak ken magasin.
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
Isip pabaknangen, Bannawag ti basaen!
