Salaysay ni JENNILYN V. SACULLES
ADUN dagiti luglugar a napasiarko, iti man Filipinas wenno iti sumagmamano a pagilian, nga ibilangko a napipintas ken napapanayag, naidumduma, ken diakto malipatan, a nagtengko. Idi damo, iti laeng lagipko ti “pangirekrekordak” wenno pangipempenak kadagiti padasko a nakapan kadagitoy a luglugar, wenno kadagiti retrato a masublian a mabuya. Ngem idi nasumokko metten ti agsuratsurat, nangruna idi nakaipablaakak metten iti Bannawag, imbilangkon a karit kaniak nga irekordko babaen ti panangisuratko dagiti mapasiarko a luglugar. Ibilangko a dakkel a karit daytoy, nga isu ti paratignay ti panagsursuratko. Ket ibilangko payen nga isu ti makaigapu a kalikagumak ti makapasiar iti ad-adu pay a lugar tapno ad-adu met ti masuratko pay.
Ditoy Lebanon, nga agdama a yanko, adu metten dagiti napasiarko a luglugar a daydaywen dagiti turista.
Nadamdamagko idin kadagiti makapatpatangko a pada nga OFW ditoy ken kadagiti nagbalin a pagayamko a Lebanese, a no managpasiarka wenno magustuam a danonen dagiti historikal a lugar, no addaka iti Lebanon, masapul nga adda iti listaam ti Château Ksara. Ket wen, inlistak a talaga a masapul a makitak dayta a lugar. Sabali manen a padas no kua a maisurat, a mabalin a maibukelak iti salaysay wenno uray daniw ken sarita.
Nagtutulagan ti grupomi nga OFW, iti panangigiya ti maysa a Lebanese citizen a kaduami, ti papanmi.
Manipud Kadagiti Agdama a Kameng ti Bannawag: Dios ti Agngina!
Innem a pulo a naglalaok a Filipino, Sri Lankan, ken Ethopian ti nangbukel iti grupomi a napan, iti maysa nga aldaw ti Domingo. Alas nuebe iti bigat ti rubuatmi. Natalinaay ti panagdaliasat ti luganmi a nakagteng iti destinasionmi.
Iti kamaudiananna, naaddaanak met laeng iti gundaway a makapan iti Château Ksara, maysa a pagaramidan iti arak iti Lebanon a binangon pay la dagiti padi a Hesuita idi 1857.
Ti Château Ksara ti maibilang a kaduogan, kadakkelan, ken kalatakan iti Lebanon agsipud ta daytoy a winery ti kaaduan iti mangbisbisita. Iti ipapanko, mairamanak metten iti aganay a 70,000 a bisita a sumarsarungkar ditoy iti tinawen. Malaksid kadagiti taga-Lebanon, aggapu iti nadumaduma a pagilian dagiti bisita, a pakairamanan ti France, Germany, ken United Kingdom.
Masarakan ti Château Ksara iti Bekaa Valley, agarup 49 a kilometro iti daya ti Beirut ken naipasdek iti disso a 3,280 a kadapan iti above sea level ken nalawlaw iti inek-ektaria nga inubasan. Ditoy a naaramid ti kaunaan a “dry wine” ti Lebanon, a nangrugian ti industria ti arak ti pagilian. Ditoy met laeng a a tanap a naduktalan ti agdua a kilometro ti kaatiddogna a duog a kueba nga inaramid dagiti nagkauna a Romano nga idi agangay ket inusar dagiti Hesuita a pagilebbenanda kadagiti barrel ti mapaingel nga arak, nga isu met ti pakaidumaan ti nalatak ken naimas nga arak ti Chateau Ksara ta mapapati nga adda naisangsangayan nga epekto iti pannaka-age ti arak ti pannakaidulinna iti uneg ti duog a kueba iti Bekaa Valley.
Segun iti website ti Ksara, idi 2010, mapan a 2.5 a milion a botelia ti wine ti in-export dagiti agar-aramid iti arak iti Lebanon ket 33% iti daytoy ti naggapu iti Château Ksara. Mailaklako dagiti arak ti Château Ksara iti 40 a pagilian, kangrunaan kadagiti pagilian iti Europa, ken iti USA, Canada, Japan, Hong Kong, Singapore, Brazil, Africa, Australia ken kadagiti Arabo a Pagilian.
Iti tinawen, makaar-aramid ti Château Ksara iti aganay a 3 a milion a botelia ti arak. Makaap-apit met daytoy iti tinawen iti mapan a 2,800 a tonelada ti ubas manipud iti 340 nga ektaria nga inubasan.
Iti kaaddami iti kaunggan ti kueba a yan dagiti binarbariles a mapapaingel nga arak, iti baet ti panangisarsarita ti babai a tour guide-mi iti pakasaritaan ti winery, inkurimedko ti nagala iti ladawan ken nagi-video babaen ti selponko. Masapul nga adda pakakitkitaak, nga ulit-ulitekto a buybuyaen, a nadanon ken nastrekko met ti makuna a paktoria ti kaiimasan nga arak ti Lebanon. Ken siempre, nayonto dagitoy a reperensia kadagiti suratek, kas maysa a nagsiding met ti dapanna, ken kas maysa a managdaliasat, managsukisok nga agngayangay a mannurat.
Ket idi imparamanda kadakami dagiti produktoda a wine, saanak a managinum iti arak ngem makunak a naidumduma man nga agpayso ti ingel ken imas ti wine a partuat ti Ksara, banag a manggubuay iti patiek a kinamannurat met kaniak ket addan dagiti nabukelko nga idea wenno bin-i dagiti suratekto pay a daniw, sarita, ken salaysay a mabalin a maibinglayto met iti kaaduan, kadagiti agbasbasa, no maikkanak iti gundaway a makaipablaakto manen iti Bannawag. Daytoy, karit kaniak tapno saysayaatek pay ti agsurat, ken tapno ad-adu pay ti masuratko, ikagumaak latta ti agpaspasiar iti sadino man a lugar, ganggannaet man wenno iti bukodko a pagilian, a pakadanonak wenno pakaisadsadak kas mangmangged ken managdakiwas. --O
TI AUTOR: Tubo ti Sto. Tomas, Alicia, Isabela. Naipasngay idi Pebrero 10, 1985. Inauna a bunga da Mr. Roger C. Saculles ken Mrs. Remedios Velasco-Saculles. Nalpasna ti Associate in Hotel and Restaurant Management iti Isabela State University. Agsangapulo ket uppat a tawenen nga OFW iti Beirut, Lebanon.
Magatang ti Bannawag kadagiti sukiyo nga aglaklako iti pagiwarnak ken magasin.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
Isip pabaknangen, Bannawag ti basaen!
