Impaulog ti Department of Education (DepEd) itay Enero 26 ti pagannurotan a nangikkat iti administratibo a trabaho dagiti mannursuro kadagiti publiko nga eskuela, babaen ti DepEd Order No. 002 s. of 2024 (“Immediate Removal of Administrative Tasks of Public School Teachers”) a pinirmaan ni Bise Presidente ken DepEd Secretary Sara Duterte.
Imbilin ni Duterte ti dagus a pannakaipakaammo ken nainget a pannakaipatungpal ti nasao a DepEd Order (DO).
Naragsakan dagiti gunglo dagiti mannursuro iti impaulog ti DepEd.
Kinuna ni Philippine Business for Education (PBEd) Executive Director Justine Raagas a maysa daytoy nga addang iti pannakarisut iti krisis ti edukasion iti pagilian.
TURISMO: Intayon Idiay Ayuyang Garden iti Pila, Siudad ti Laoag!
Namnamaen ti Teachers’ Dignity Coalition (TDC) nga agpaypayso koma a maipatungpal daytoy a pagannurotan kadagiti amin nga eskuela iti pagilian.
Kinuna ni TDC National Chairperson Benjo Basas a saan laeng koma a dagiti administrative staff ti inayon ti DepEd, no di ket dagiti dadduma pay a kasapulan ti eskuela kas iti guidance counselor, property custodian, nurse, security officer, utility worker, ken dadduma pay a kameng tapno saanen a trabahuen ti mannursuro ti ania man a trabaho dagiti nadakamat nga empleado malaksid ti panangisuro daytoy. (Merlina Hernando-Malipot/Manila Bulletin//Lito Hilidon/Bannawag)
