Inyusuat ti Quirino State University (QSU) iti Diffun, Quirino ti proyekto a "Bambusari" a nairanta a mangsalaknib iti aglawlaw ken para iti akademiko a panagrang-ay.
Naadaw ti "Bambusari" manipud iti sao a “sari-saring bamboo,” a kaipapananna, nadumaduma a kita ti kawayan.
Narugian ti proyekto babaen ti panagmulada kadagiti 15 a kita ti kawayan iti eskuela.
Ni Forester Joel G. Carig ti nangbalabala iti daytoy a gannuat, agraman Propesor Yanika P. Nolasco ken Elizabeth T. Carig babaen ti suporta ni QSU President Hermenegildo F. Samoy Jr.
TURISMO: Intayon Idiay Ayuyang Garden iti Pila, Siudad ti Laoag!
Kinuna ni Carig a kayatda a pagbalinen a ‘Bambusetum' dagiti di naumalaan a paset ti unibersidad. Ti bambusetum ket maysa a lugar a namulaan iti nadumaduma a kita ti kawayan, native man wenno exotic, a pinadakkel para iti sientipiko a panagadal, panagsukisok, ken pangpapintas iti aglawlaw.
Agserbi ti Bambusetum a kas Student Instructional Unit (SIU) para iti agrikultura, panagbakir, biosystem, inhenieria, panangiwardas iti turismo ken panangsangaili, ken lugar a pagsukisokan dagiti mannursuro.
Maipasdek ti Bamboo Park nga agbalinto a Bamboo Eco Park nga addaan iti pagkampuan (camping site) ken conference hall. (Thelma Bicarme/OTB/TCB/PIA-2, QUIRINO//Lito Hilidon/Bannawag)
