Nangilatang ti Department of Social Welfare and Development (DSWD) iti aganay a PhP86.8 a milion para iti implementasion ti Risk Resiliency Program (RRP) iti Ilocos Region manipud Pebrero agingga iti Hunio i'toy a tawen. Nakapokus ti programa tapno maleplep wenno makontrol ti epekto ti El Niño wenno panagtikag.
Segun ken ni DSWD Ilocos Disaster Response Management Division chief Maricel Caleja, 9,978 a pamilia iti 20 a local government unit (LGU) nga addaan iti high poverty incidence ti puntiria a mabenepisiaran ti maisayangkat a cash-for-work program ken cash-for-training program.
Innayon ni Caleja a makategged dagiti benepisiario iti PhP435 tunggal aldaw iti 20 nga aldaw, a ti 16 nga aldaw ket para iti panagobra idinto a ti uppat nga aldaw, para iti skills training.
Aggapu dagiti benepisiario, a sumagmamano kadakuada ti mannalon ken mangngalap, kadagiti ili ti Adams, Badoc, Dumalneg, Nueva Era, ken Pagudpud iti Ilocos Norte; Burgos, Cervantes, Quirino, Sugpon, ken Suyo iti Ilocos Sur; San Carlos City, Urbiztondo, Mabini, Burgos, ken Agno iti Pangasinan; ken Aringay, Bagulin, Caba, San Gabriel, ken Santol iti La Union. (Hilda Austria/PNA)
