Dagiti mangngalap ti mangibangbangkag kadagiti ikan a taraon ni kaamaan a Filipino, ngem addada iti komunidad nga agsagsagaba iti malnutrision gapu iti saan a natalged a taraon, segun iti panagsukisok ti Department of Science and Technology (DOST) itay Pebrero 1.
Pinatalgedan ni Department of Science and Technology-Food and Nutrition Research Institute (DOST-FNRI) Senior Science Research Specialist Dr. Eva Goyena a nabayagen a parikut ti malnutrision iti Filipinas, ngem nakarkaro ti kaso daytoy kadagiti kaamaan dagiti mangngalap.
Segun iti datos ti National Nutrition Survey, kakaruan a parikut ti nasinga nga idadakkel dagiti ubbing nga annak dagiti mangngalap, ken ad-adu kadakuada ti narapis ken nalag-an no idasig iti kaamaan a saan a panagkalap ti panggedanda.
Kinuna ni Goyena nga adda ti "di madlaw a panagbisin" iti nakuna a komunidad a saan nga umisu ti maipapaunegda a bitamina ken mineral, a mangapektar iti panagdakkel dagiti ubbing.
TURISMO: Intayon Idiay Ayuyang Garden iti Pila, Siudad ti Laoag!
Kinuna ni Goyena a dagiti mangngalap ti mangipapaay iti taraon nga ikan ngem isuda met ti makurangan iti kastoy a taraon, gapu ta ilakoda dagiti napipintas ti kalidadna nga ikan ket ibatida a sidada dagiti pagpilpilianda.
Isuda dagiti agindeg iti makunkuna a Geographically Isolated or Depressed Areas (GIDA) iti Lauden ti Visayas nangruna iti Isla ti Panay, BARMM (Bangsamoro Autonomous Region in Muslim Mindanao), Zamboanga Peninsula, MIMAROPA (Oriental Mindoro, Occidental Mindoro, Romblon, Palawan), agraman ti Bicol Region.
Innayon ni Goyena nga idatagda daytoy a natakuatanda tapno mapakaammuan dagiti agpampanday iti linteg, agraman kadagiti maseknan a gobierno lokal.
Kinuna pay ni Goyena a saanen a maagasan dagiti epekto ti malnutrision, isu nga maipangpangruna koma ti salun-at dagiti ubbing kangrunaanna iti umuna a 100 nga aldaw dagitoy tapno maliklikan ti parikut ti panagdur-as ti panunotda. (Lizst Torres Abello/Manila Bulletin//Lito Hilidon/Bannawag)
