Impakaammo ti Department of Agriculture (DA) nga adu ti natikagan a pinagayan iti Western Visayas ken Zamboanga iti umuna bulan ti tawen, gapu iti ikakaro ti El Niño.
Kinuna ti DA-Disaster Risk Reduction Management (DA-DRRM) nga addan PhP109 a milion ti balor ti nadadael a pinagayan iti arinunos ti Enero, a nakaapektar iti 2,602 a mannalon.
Manamnama koma a mapan a 4,758 metrika tonelada (MT) ti maapit iti ag-2,177-ektaria a talon.
Gapu iti daytoy, mangiruar ti DA iti pakaammo maipapan iti kasasaad ti panawen ken napimpintas a panangiwardas iti mula kadagiti maseknan tapno saan a masayang dagiti apit.
TURISMO: Intayon Idiay Ayuyang Garden iti Pila, Siudad ti Laoag!
Adalen ti DA ti datos mainaig iti panagmula ken panagapit iti pagay ken mais, ken dagiti pagtaudan ti padanum a kas iti dam, small water impounding systems (SWIP), ken small-scale irrigation projects (SSIP).
Segun iti DA-DRRM, napanen a 211 a metro ti kangato ti danum iti Angat Dam iti arinunos ti Enero.
Impanamnama ti National Irrigation Administration (NIA) nga umdas ti danum iti Magat Dam, a maysa kadagiti kadakkelan a rekursos ti danum iti Filipinas.
Innayon ti NIA a dagiti maipatpatakder a solar pump irrigation ken dam iti deppaar ti Visayas ti manamnama a mangep-ep iti epekto ti tikag. (Gabriell Christel Galang/Manila Bulletin/Lito Hilidon/Bannawag)
