Indagadag ti Council for the Welfare of Children (CWC) kadagiti nagannak a bantayanda dagiti annakda nga agus-usar iti internet tapno mailiklik dagitoy iti mabalin a pannakabusoda.
Kinuna ni CWC Executive Director Angelo Tapales itay Pebrero 1 a pagrebbengan dagiti nagannak a salakniban dagiti annakda maibusor kadagiti peggad iti internet.
Segun ken ni Tapales, masapul a lasinen dagiti dakes a linaon ken tattao iti internet, isu a mabilin koma dagiti ubbing a saanda a makipatpatang iti dida am-ammo iti internet, ken liklikanda ti agusar iti mapagduaduaan a website.
Malaksid iti daytoy, nasken nga ammuen dagiti nagannak no kasano ti agipulong ken makiuman iti Makabata helpline 1383 tapno maireport dagiti kaso ti panagabuso.
TURISMO: Intayon Idiay Ayuyang Garden iti Pila, Siudad ti Laoag!
Segun iti datos ti Philippine National Police, adda 17,681 a kaso ti panangranggas kadagiti ubbing idi 2023, ket kaaduan kadagitoy ket kaso ti panangrames ken aramid a kinaderrep.
Nasurok a 1,000 ti kaso ti seksual a panagabuso iti online ken pananggundaway kadagiti ubbing idi 2023, idinto a nairaman ti adu a nagannak, kakabagian wenno tattao a nasinged kadagiti ubbing iti seksual a pannakaabusoda iti online.
Imballaag ni Tapales a biddut ti kapanunotan a masapul a tumulong dagiti ubbing iti panagsapul iti pagbiag ti pamilia, ket ipagarupda a mabalinda latta a retratuen wenno i-video dagiti ubbing tapno mailakoda gapu ta awan met ti pisikal a kontak; idinto a mabalin a mailako dagitoy a retrato wenno video iti dark web.
Binalakadan ni Tapales dagiti nagannak a mangilatangda iti oras a makisarita kadagiti annakda. (Ma. Cristina Arayata/PNA/Lito Hilidon/Bannawag)
