Sarita ni ANGEL C. ANDEN

Naipablaak iti Pebrero 15, 1960 a bilang ti Bannawag.

KASANGSANGPET idi ni Jacinto Vergara manipud iti bassit a taltalonenna a minulaanna iti tabako. Uk-ukodenna ti nakuttong a nuangna. Sinabat ti kaanakanna a babai a makipagtataeng iti balayda. "Tata, adda surat ni Nana." kinuna ti balasitang.

Inawat ni Jacinto Vergara ti panakkelen a kuadrado a sobre a nakaisuratan ti nagan ti asawana: Florentina Calderon.

Nagrupanget ni Jacinto Vergara. Siasino ngata ti agsurat iti asawana, a nangaramat pay met ngarud iti naganna idi dida pay nagasawa? Dina kadi ammo a naasawaanen ti sursuratanna?

Iti sumagmamano a nairteng a darikmat, kinitkita ni Jacinto Vergara ti sobre kadagiti nakersang a ramayna a rinugitan ti panglabagaen a pitak ti talon, idinto a di met nagkutkuti ti nuang nupay isapsaplitna ti ipusna a pangbugawna kadagiti bingraw a sumayangguseng iti likudanna. Saan a maawatan ni Jacinto Vergara ti kaadda ti sobre. Agngalayen ti Pebrero, sumagmamanon a bulan kalpasan ti panagkallaysada ken ni Florentina Calderon. No maysa a Pamaskua a tarheta, apay nga ita laeng a sumangpet? Ngem ad-adda a nangriribuk kenkuana ti nagan nga inaramat ti nagsurat.

Sarita

Bay-am a Yebkas Dagiti Sabong

Sinang-il ti nuang ti bingraw iti kulay-ongna. Nalagip ni Jacinto Vergara ti ayup, napanna inggalut iti linong ti sangapuon nga arimando iti abay ti balay. Nagturong iti pagagdanan tapno urayenna ti baketna. Mangrugi idin nga aglabas dagiti ubbing nga aggapu iti pagadalan. Nakaranting ti pannagnada gapu iti napudot a tapok a dinadang ti agmatuon nga init, nakatartarabitda a kasla mauraman a sanglay. dandani met itan ti asawana a maikuyog kadagiti padana a mangisursuro.

Nalang-ab ni Jacinto Vergara ti baniit ti naling-etan a badona. Minatmatanna ti dagadaga a putot a sapinna, dagiti nalasag a luppona, dagiti awanan-tapar a sakana. Nalagipna ti pammabalaw ti baketna idi nabiitda pay ditoy probinsia, iti panagsakasakana a mapan agtalon, ti angotna no aggapu iti kainaran. Ita, a panangig-iggemna iti sobre a nakaisuratan ti nagan ti asawana idi balasang, nariing manen ti pannakaikawana manipud idi narpuog ti arapaapna iti panagbalinna nga abogado, ti kaawanen ti pumalpalayupoy a pantalon a kas iti ar-aramatenna idi agad-adal idiay Manila, ti manmanon a panagpomadana iti nangina. Agatling-et lattan ti kulot a buokna.

Dina napuotan ti panangipaidna iti sobre iti rupana. Naimtuodna manen iti nakemna: Naragsak koma ngata ni Tina no dida nagtaray sakbay a naturpos ni Tina ti kursona iti Normal? Napegges idi unay ti panagayatna ken ni Tina. Kinaamak ni Jacinto ti taga-Bulacan a baknang ken kapingetan a kabinnalubalna iti ayat ni Tina. Ket sakbay a nakapagpanunot a naimbag ni Tina, addadan iti dalanda nga agpa-Laguna. Maysa a kabagian ni Jacinto ti napanda nagkamangan sadiay. Daytoy a kabagianna ti nangimatang iti panagkallaysada iti bassit a simbaan.

Gapu iti pannakakumikomna, di payen malagip ni Jacinto Vergara ti kaaddana iti kainitan iti sango ti pagagdanan. Ania ngata ti naguneg ti sobre? Surat? Pamaskua a tarheta? Wen ngata! Tarheta! Tarheta la ketdi. Ngem apay a nagladawen?

Insarangna ti sobre iti init ngem dina maanninawan ti naguneg. Napuskol ti sobre. "Suratna," nayesngawna, "isunto ti manglukat."

Awan pay ti linukatanna a surat ni Tina. Adun dagiti naawatna manipud kaadalanna idiay Normal. Manipud met kadagiti kabagian ni Tina idiay Batangas. Ngem naggapu daytoy idiay Manila. Timbre ti Manila ket naiturong iti dormitorio a nagtaengan ni Tina idiay Sampaloc. Nakurosan ti nagan ti dormitorio ket adda nangisurat iti: Bauang, La Union. Naimbag ketdi ta napugtuan ti kartero ti Bauang nga agpaay daytoy a sobre iti asawana. Adda met utek daydiay a kartero. Wenno nagdamag ngata kadagiti am-ammo ni Jacinto Vergara ket naammuanna ti nagan ti asawana.

Napan met la nagtugaw ni Jacinto Vergara iti maikatlo a kababaan a tukad ti agdam ket pinasungadanna ti baketna nga aggapu iti pagadalan idiay Calumbaya, ti away nga adda iti labes ti maysa a kilometro iti daya. Masansan nga umun-una a sumangpet ni Tina, ngem iti dayta nga aldaw, madi ti rikriknaen ni Jacinto isut' gapuna a nagawid a nasapa.

Dina ammo no kasano ti langa nga ipasabatna iti baketna no sumangpet. Agparang ngata a makapungtot gapu iti kaadda ti surat manipud iti tao a di makaammo a nagasawadan? Wenno agin-iimon ngata?

Minatmatanna manen ti sobre. Kinutogna daytoy sana linang-ab. Saan a nabanglo. Saan a nabangbangluan a kas kadagidi suratna ken ni Tina idi agdatdaton pay laeng. Naggapu iti babai, napanunotna ket nakagin-awa. Iti kaadalan ni Tina.

Napasungadanna ni Tina. Nalag-an pay laeng ti panagad-addang ti baketna nupay nabannog iti klase. Nailasinna nga umis-isemen ni Tina a nakakita kenkuana. Iti kaay-ayona nga isem a kasla sabong nga umis-isem iti yaagek ti agsapa.

Immanges ni Jacinto Vergara iti nauneg. Kasla makerrasan ti bannogna no maimatanganna ti isem ti baketna. Isubli dayta nga isem ti baketna daydi langa ni Tina idi damoda ti agkita, ket tunggal malagip ni Jacinto daydi a kanito, umanges iti nauneg a kasla dayta ti pangigawidna iti kinasam-it daydi a panagam-ammo.

"Ania ti ar-aramidem iti agdan," kinuna ni Tina, iti timek a nasarangsang nupay kasla agunget. Nagsao iti Ingles gapu ta di pay la makapagsao a naimbag iti Ilokano, ken Ingles ti aramatenna no maragsakan wenno maibusan iti pagsasao ti lakayna.

"Inur-uraykayo, Balasang Florentina Calderon," insungbat ni Jacinto iti Ingles.

Nalabit a di nangngeg ni Tina ti kinunana, ta intuloy ti baketna ti panagis-isemna nga umasideg. Nagandap dagiti napudaw a ngipenna a naitangkarang kadagiti bibigna a napalabaga iti apagapaman.

Idi sumaggatlo laengen nga addang ti nagbaetanda nga agassawa, imparang ni Jacinto ti sobre. "Am-ammoyo kadi ti agnagan iti Florentina Calderon ditoy, apo?" inyayugna iti bengngatda a taga-Bauang.

Nagparang ti apagapaman a panagduadua iti rupana a pangisiten ti natangken nga init ti Kailokuan. Idi agangay, naggilap dagiti matana. "Naggapuanna?"

"Kasano ti pannakaammok?" inimtuodna met, ket impadlawna ti pannakasemsemna. "Diak met luklukatan dagiti suratmo."

"Dimo pay la ngamin linukatan. Awan met ti palimedko kenka," kinuna ni Tina sana innala ti sobre. "Pamaskua a tarheta daytoy," kinunana idi luklukatanna. "Ne! Saan!"

Naimatangan ni Jacinto ti napintas a tarheta nga agpaay iti St. Valentine's Day, ti aldaw dagiti agaayan-ayat. Maysa daytoy a tarheta nga addaan iti dua a dadakkel ken agkaasmanng a nalabaga a sinampuso. Awan met ti pakaidumaan ti naisurat iti unegna: kadawyan a kablaaw a masarakan kadagiti amin a tarheta nga agpaay iti dayta a gundaway. Awanan iti nauneg ba kaipapanan. Saan a makasair.

Ngem adda naisurat iti babaen ti nayimprinta. Naisurat iti Ingles: "Ti dinto manglipat."

Binaliktad ni Tina ti tarheta idinto a siulimek ti lakayna a nagpalpaliiw. Ngem awan makitana a pangilasinanna iti nangted.

"Impagarupko la no tarheta iti Paskua," kinuna ni Jacinto. "Siasino ti nangipaw-it?"

"Diak ammo. Awan met ti naganna, kitaem," inyawatna ti tarheta.

Minatmatanna ti naisurat iti ima. Dina nailasin ti porma. Ngem ammona a maysa a lalaki tti akingapuanan. "Naggapu ngata iti babai?" inimtuodna.

"Kasla saan a surat ti babai," insungbatna. "Adda la ngata nangrabak kaniak. Ammom metten dagiti tarheta ti Valentine's. Kaaduan kadakuada ti ang-angaw laeng."

Inyawat ni Jacinto ti tarheta iti baet ti panangnamnamana iti panangpigis wenno panangpuor ni Tina iti daytoy. Ngem simbrek ni Tina iti siledda ket nalabit indulinna ta saanen a nakita ni Jacinto ti tarheta kalpasanna.

Nupay kasta, intuloyna ti panangrabajna ken ni Tina iti las-ud ti sumagmamano nga aldaw. "Naggapu ngata iti sigud nga agdaton kenka," kinunana. "Siasino ngata kadakuada?" Tallo idi ti kapingetan a kinasalisalna. "Dimo kadi mailasin ti pormana?"

"Isapatak a diak mailasin ti nagsurat. Awan ti kasta a porma dagiti surat a naaw-awatko."

Sapay koma ta pudno dagiti sinaona, nakuna ni Jacinto iti nakemna, ngem agarup malipatannan idi agangay gapu iti kaadu ti tamingenna, kas iti panagsibug iti tabako, panagikkat iti igges, ken pananglagdana kadagiti alad.

Namimpinsanen a nayaw-awanna ti tarheta idi naglabasen ti makatawen ket dimteng manen ti Pebrero. Inur-urayna ti kartero iti Pebrero 14. Ngem sa la nagparang ti kartero iti maika-15 nga aldaw. Kadakdakkel daydi immuna a sobre ti inyawatna ita.

"Kasdi manen ti nakaituronganna, pari," kinuna ti kartero. Nakurosan ti nagan ti dormitorio iti baba ti Florentina Calderon. "Saan kadi pay nga imbaga ni misis a ditoy ti pagtaengannan ken nasukatanen ti apeliedona?"

"Saan pay, pari," insungbat ni Jacinto.

Sinipsiputanna ti yaadayo ti kartero a nagsakay iti nangisit a bisekleta. Kalpasanna, inulitna manen dagidi tignayna ifi awatenna daydi umuna a tarheta. Insarangna iti init, winagwagna, linang-abna.

Pinasungadanna manen ni Tinang a limmukmegen. Nangisit ti payongna ket kasla adda liday kadagiti matana. "No adda la koma anakmi," nakunana, a kas iti makunana no makitkitana ti liday iti rupa ti baketna. Masansan nga agtugaw ni Tinang iti 'yan ti tawa, kumitkita iti laud, iti baybay iti labes dagiti niog a nangtaraigid iti kadaratan.

Saan ngata a ninamnama ni Tinang ti pannakadanonna kenkuana iti agdan. "Apay, nasapaka ita?" kinuna, iti pagsasao ti Amianan. Nakaadalen iti Ilokano ken narigaten nga ilasin a maysa a Tagalog. Nakasursuro payen nga agtabako, nupay tinungday ni Jacinto ti panagtabakona. Saan a kayat ni Jacinto a ngumisit dagiti napudaw a ngipenna.

"Dimo kadi malagip a Pebrero manen?"

Dina ngata nasippaw ti kayatna a sawen ta nagrupanget. Inruarna ti sobre. "Ti sigud a gayyemmo," kinunana, ket indagdagsenna ti maudi a balikas.

"'Yannan, kitaek man," kinunana ket siaannad a nangala iti sobre idinto a nakarenken ti mugingna. "Ne, isu met laeng ti nangted," innayonna. Linukatanna ti sobre. Kasdi manen ti ladawan iti sobre, dua a nagkaasmang a nalabaga a sinampuso, umasping met dagiti binatog a nayimprinta ken adda man met laengen iti babaenna ti "Ti dinto manglipat" a naisurat iti tinta iti baba.

Binidingbidingna ti surat, inyasidegna iti agongna. "Saanen nga ang-angaw daytoy," nakunana.

"Masdaawak man. Apay a dina isurat ti naganna? Wenno apay a dina pabigbig ti kinasiasinona?"

"Aginkukunakan sa met." inyangawna idinto nga innalana dagiti libro nga imet ni Tinang. "Saanak man met nga agimon."

"Laklakayankan, dika pay la agnakem," inkuddotna. "Siasino ngay ti agrayo kaniak, bakbaketanakon?"

"Ammok ngay? Napintaska pay met laeng." Sana innayon kalpasan ti sumagmamano a darikmat: "Apay ngay no suratam koma, ta ibagam a naasawaankan."

"Kasanot' panangsuratko ngay no diak met ammo ti naggapuanna? Diak pay ammo no asino ti nagsurat."

"Diak met agunget ket, no ipudnom," kinunana, ket ita nakarikna iti panagimon a nangkaut iti barukongna.

"Ti la sasawenna," indillaw ni Tinang. "Awan daytoy, laklakayan. Agimon ketdin, dina pay ammo ti pagim-imonanna."

Nagkatawa iti nakapsut sana inted ti tarheta iti baketna. Ninamnamana a dadaelen ni Tinang ti tarhea. Ngem idi agsubli manipud iti bangsal a napanna nagbugguan, nakastreken ni Tinang iti siled ket nalabit napanna intipon ti sobre iti immuna a naawatna.

Saan a nakita ni Jacinto ti tarheta iti sumuno nga aldaw ket naamirisna a no agsukain iti aparador ni Tinang, masarakanna dagiti dua a tarheta iti pandag dagiti lupot. Iti maysa nga aldaw, naituredna nga imbaga iti asawana a dadaelenen daytoy dagiti dua a tarheta. Ta no ngamin agangaw ni Tinang, iruarna dagiti tarheta sana basaen dagiti binatog, tapno pangrabakna ken ni Jacinto. Ngem napateg ken ni Tinang ti ania man a maawatna a banag, kas iti sangaubon a sabong ti sampagita nga inted ni Jacinto iti daydi a maika-20 a panagkasangay ni Tinang, ken sabali pay a a pakalaglagipan. Kadawyan pay ni Tinang ti panangurnongna kadagiti daniw ni ayat a maipablaak kadagiti pagiwarnak, daniw a napnuan iti agkakasam-it a balikas a di kaay-ayo ni Jacinto. Napuskolen ti sinanlibro a pangipigpigketan ni Tinang kadagita a daniw.

Pinadpadaananna ti panagbunga ti ayan-ayatda. Nakunana iti nakemna a no adda ubing a tagibien ni Tinang, a panawan ken sangpetanna manipud iti pagadalan, nalabit mayaw-awan koma ni Tinang ti lidayna no agmaymaysa iti balay no saan a mapan mangisuro, Ngem saan a dimteng ti maladaga. Apagisu met ti matalonan ken malapoganna a pagbiaganda iti makatawen, ken pangalaanna iti kawes nga ipa-Paskuana iti baketna.

No makitkita ni Jacinto ti panangkitkita ni Tinang iti baybay, malagip ni Jacinto ti napalabas ket makababbabawi no apay a dina inleppas nga umuna ti karerana tapno, kas maysa nga abogado, maitedna koma ken ni Tinang ti nawaywaya a panagbiag. Ngem ti nalpas, nalpasen.

Tinawen ti panagsangpet ti tarheta ket tinawen met a napagteng ti pasamak iti sango ti pagagdanan ti kawayan a balay a pinalakayen dagiti tudo ken ti init.

Ipakpakita ni Jacinto ti kaawan ti panagimon, ngem dina mapengdan ti ikakaut ti imon iti barukongna tunggal makitana ti igigilap dagiti mata ni Tinang no luklukatanna ti sobre ken ti lailo dagiti ramayna no uyosenna ti tarheta. Idi agangay nadlaw ni Jacinto ti panangisuot ni Tinang iti kabarbaro a kawesna no dumteng ti Pebrero 14. Agsabong dagiti bibigna iti marabamban nga isem ket mangluto pay iti naimas a pangaldaw. Nagindidiammo ni Jacinto ngem iti unegna, adda dina maibagaan a rikna, no nalamiis wenno napudot, dina ammo.

Idi rumbeng a sumangpet ti maikanem a tarheta, naginsasakit ni Jacinto. Naikeddengnan ti aramidenna. Dadaelenna ti tarheta ket ipatigmaannanto metten iti kartero ti saanton a panangipatulod daytoy kadagiti sumarsaruno a tarheta. Ngem napanunotna met laeng idi agangay a nasaysayaat no dina iparipirip iti kartero ti panagimonna. Saanna a maaramid dayta. Agwaraston ti damag iti awayda, ken iti ili, a pagim-imonanna ti maysa a sigud a kaayan-ayat ti baketna.

Simmangpet ti kartero. Ngem awan ti surat a naiturong ken ni Tinang.

Kas iti napalabas a Pebrero 14, nasapsapa manen a simmangpet ni Tinang manipud iti pagadalan iti dayta a malem. narimat dagiti matana. Ket nupay maminduan ti bagina, kasla immubing dagiti sakana.

"Pinagawidko dagiti ubbing a nasapa," kinunana iti nasarangsang a timek. "Mapankami agpipiknik idiay Poro Point no bigat."

"Ken sinapsapam ti agawid tapno ad-adu ti panawenmo a mangbasa iti tarhetam," impasagid ni Jacinto.

"Kitaek man? Addan?"

"Addan ti? Oy, wen gayam! Ti tarheta nga impaw-it ti agrayo kenka. Saan pay a simmangpet, inton bigat ngata."

Dimteng ti sumuno nga aldaw ngem awan ti simmangpet a tarheta.

"Nalipatannakan sa ketdin nupay inkarina a dinto manglipat," insuronna ket nabang-aran.
Iti sumuno nga agsapa, pinagkawes ni Tinang ti maysa a daanen a badona idi mapan mangisuro. Kasla kimmaro dagiti nangisit nga uged iti babaen dagiti matana. Saanna a pinalabaga dagiti bibigna ken saan met a nasayaat ti pannakasagaysay ti buokna. Nadagsen ti pannagnana, a kasla ita laeng a mariknana ti ilulukmegna.

Nayaw-awan met laeng ni Tinang ti lidayna kalpasan ti dua a lawas. Ngem idi dimteng manen ti Pebrero, nagsubli ti ganaygay ken katkatawana ket kasla saan a makaidna. Rabiin no panawanna ti ar-aramidenna a lesson plan; iti agsapa, mabayag nga agrubuat ken tantanangenna ti panangpapintasna iti rupana. Adda malaglagipna, makuna no kua ni Jacinto iti unegna. Ket lumaem ti imonna iti tukot ti pusona.

Idi agangay, naikeddeng ni Jacinto ti panangtuntonna iti agipawpaw-it iti tarheta. Iti maikadua a lawas dayta a Pebrero, imbagana ken ni Tinang ti ipapanna idiay Manila. "Mapanko pasukay ti tuntuntonek a back pay," kinunana. "Amangan no naipempenen idiay Komision."

"Yawidannakto man iti magasin, kaaduem," kinuna ni Tinang. "Saanka nga agyan sadiay."

"Apagbiitak la'ng," insungbat ni Jacinto. "Maiwakasko la ketdin ti gagarak, agawidak met la't daras."

Idi nakasangpet idiay Manila, simmarungkar iti dormitorio a nagdagusan idi ni Tinang. Inimtuodna no adda surat nga agpaay iti Florentina Calderon. Awan. Naammuanna a maysa a mensahero ti mangitultulod kadagiti surat ni Tinang. "Kalpasan ti tallo a tawen, imbilinko iti mensahero nga iturongna ti surat idiay iliyo," kinuna ti mangimaton iti dormitorio.

"Ammoyo kadi ti opisina ti mensahero?"

"Diak masinununo ngem maysa kadagiti kompania nga agitultulod iti surat babaen ti mensahero. Asul ti unipormena… ay, malagipkon… Mercury Express…"

Maysa a lakay nga agar-aramat iti napuskol nga anteohos ti nagdamagan ni Jacinto iti opisina ti Mercury Express.

"Adda kadi paitulodyo a surat, apo?" dinamag ti lakay.

"Awan, ngem umayak agreklamo. Siak ti nagpapaitulod kadakayo iti surat iti dormitorio idiay Sampaloc. Saanna kano a naawat ti surat itay napan a tawen."

Dinamag ti lakay ti nagan ni Jacinto, ngem naglisi daytoy ket kinunana: "Maysa a Florentina Calderon, ti pakaiturongan koma ti suratko."

"Ah," nagmulagat ti lakay. "Dakayo gayam ti nagpaipaw-it kadagidi a tarheta! Saanen a nasken a sukimatek ti librok. Ngem ammok a lima laeng a tawen ti binayadanyo tapno maitulodmi dagiti tarheta ti Valentine's Day."

"Lima laeng a tawen?" Naginsisiddaaw ni Jacinto.

"Wen, nalipatanyo kadin? Kinunayo idi sakbay a maibaonkayo idiay Korea nga ipatulodmi ti maysa a Valentine's card iti balasang nga agnagan iti Florentina Calderon iti uneg ti lima a tawen. Kaano ti panagsubliyo manipud idiay Korea?"

"Korea? O, nabiit pay," inyallangon ni Jacinto. "Ania ti naganko nga imbagak iti kadakayo? Inyunay-unayko idi a diyo ipakpakaammo ti naganko kenkuana."

Napan inruar ti lakay ti daan a log book. "Adtoy… este… Josefino Baradi! Wen, diyo kad' malagipen?"

Josefino Baradi! Isu ti maysa kadagiti napinget nga agrayo ken ni Tinang. Napuner a lalaki, managisem dagiti matana ken agessem idi nga agsurat iti daniw.

"Ngem kasla nabasak… no saanak a nagbiddut, apo, a nataykayo iti gubatan idiay Korea."

"Kasta ti damag, ngem nakalasatak," kinuna ni Jacinto Vergara. Immanges iti nauneg. Maysa gayamen a bangkay ti pagim-imonanna. Immanges manen iti nauneg. Kasla adda sangasako a bagas a naikkat iti barukongna. Minatmatanna ti lakay. Nagrimat iti nakemna ti maysa a nangayed a panggep. "Ket ita," kinunana manen, "umayko paituloy ti panagpaitulodko iti tarheta. Kas met la idi, nasken a sumangpet kenkuana ti tarheta iti tunggal Pebrero 14."

"Kaano ti panangrugina?"

"Ita met laeng. Iturongmo ti surat idiay Bauang, La Union ta--"

"Sadiay man met ti nangituronganmi kadagiti naudi a tarheta."

Nangiruar n Jacinto Vergara iti duapulo a pisos. "Mano a tawen ti mabayadan daytoy?"

"Sangapulo a tawen, apo."

Inyawat ni Jacinto Vergara ti kuarta iti lakay. "Ipaw-itkonto ti nayonna tapno agpaut iti duapulo a tawen."

"Duapulo a tawen!" Nagmulagat ti lakay. "Ipatpategyo unay ngata dayta a tao?"

"Unay unay," inyisem ni Jacinto Vergara ket agpakada koman ngem nalagipna ti maysa a saludsod. "Ania idin ti paisursuratko iti uneg ti tarheta?"

"Ti dinto manglipat, apo." kinuna ti lakay. "Kasta kadi met laeng ti isuratko?"

"Wen. Ngem dimo isurat ti naganko, a kas idi!" kinuna ni Jacinto Vergara ket nakaranraniag ti rupana idi rummuar iti ridaw. Sikakaranting a nagna agingga idi malabsanna ti paglakuan kadagiti pagiwarnak ken magasin. Simmardeng ket gimmatang iti yawidna a basaen ti asawana. --O

Magatang ti Bannawag kadagiti sukiyo nga aglaklako iti pagiwarnak ken magasin.

Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.

Mabalin pay a magatang ti Bannawag iti

Shopee: http://bit.ly/Bannawag-Shopee

Lazada: http://bit.ly/Bannawag-Lazada

Para iti digital a kopia:

PressReader: http://bit.ly/3n83kNQ

Magzter: http://bit.ly/407pazG

Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph

Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,

iti Instagram: https://www.instagram.com/bannawagmagazine

iti Twitter: https://twitter.com/BannawagMagasin

Facebook Page: https://www.facebook.com/BannawagMagasin

Facebook Public Group: https://www.facebook.com/groups/bannawag.magazine

Dios ti agngina.

Isip pabaknangen, Bannawag ti basaen!