Impanamnama ti Department of Information and Communications Technology (DICT) iti publiko ita, Pebrero 5, a natalged ti Filipinas kalpasan a nalapdanda ti panggep a panang-hack iti sistema ti Overseas Workers Welfare Administration (OWWA) ken ti Google Workspace ti gobierno.
Inlawlawag ni DICT Undersecretary for Infostructure Management, Cybersecurity and Upskilling Jeffrey Ian C. Dy nga iti napalpalabas a lawas, nakitada nga adu ti insidente ti panang-hack, saan laeng nga iti Filipinas, no di ket pay iti entero a lubong.
Dinakamat ni Dy ti pannaka-hack met laeng ti Microsoft a naglaon iti email ti gobierno ti Estados Unidos.
Imbatad ni Dy a dagiti nagpanggep a mang-hack iti OWWA ket kayatda a pasardengen ti website ti ahensia; idinto a dagiti nang-hack iti Google Workspace, kayatda ti agkalap iti impormasion wenno account ti administrasion.
Manipud Kadagiti Agdama a Kameng ti Bannawag: Dios ti Agngina!
Segun ken ni DICT Assistant Secretary Aboy Paraiso, babaen ti internet protocol (IP) address nga inaramat dagiti hacker, napaneknekan a naggapu daytoy iti "China Unicom," maysa a kompania ti telekomunikasion a kukua ti gobierno ti China.
Nupay kasta, inlawlawag ni Dy a saanda a maibaga a ti gobierno ti China ti akin-aramid iti panang-hack. (Sonny Daanoy/Manila Bulletin//Lito Hilidon/Bannawag)
