Impanamnama ni Presidente Ferdinand Marcos Jr. kadagiti mannalon ti sibubukel a panangsuportar kadakuada ti gobierno no adda umay a didigra, nangruna ti El Niño phenomenon.
Daytoy ti inkari ni Presidente Marcos iti naangay a panangted iti hauling truck, bukbukel, ken tulong-pinansial kadagiti nasurok a 12,000 a mannalon ken 10 a kooperatiba ken gunglo dagiti mannalon iti Barangay Mandili, Candaba, Pampanga.
Inkari pay ni Presidente Marcos kadagiti mannalon a katulonganda ti gobierno a mangsaranget iti pangta ti El Niño iti agrikultura.
Manamnama nga agpaut ti El Niño agingga iti Hunio ket agpeggad latta ti agrikultura agingga iti maud-udi a bulbulan ti 2024.
Manipud Kadagiti Agdama a Kameng ti Bannawag: Dios ti Agngina!
Kinuna ni Presidente Marcos a naisaganan dagiti programa a mangep-ep iti epekto ti El Niño ken mangsuportar kadagiti maapektaran a mannalon.
Innayon pay ti Presidente nga ilungalong ti gobierno ti panangpasayaat kadagiti impraestruktura, panangiwarnak iti impormasion, ken panangpatibker iti sistema ti irigasion babaen ti Philippine Solar-irrigation Project and Small-scale Irrigation Projects.
Impaganetget ti Presidente nga adda nailatang a PhP31-bilion babaen ti National Rice Program a mangpapigsa iti programa ti administrasion. Aramaten pay ti gobierno ti Rice Competitiveness Enhancement Fund tapno maponduan dagiti maaramat a pagarado, traktor, seeder, tresher, repear, ken pagbilagan. (Betheena Unite/Manila Bulletin//Lito Hilidon/Bannawag)
