Binallaagan ti Philippine Health Insurance Corporation (PhilHealth) ti publiko itay Pebrero 8 nga agannad iti panagraira ti peke a website a mangus-usar iti nagan ti PhilHealth maipanggep iti panagpautang.
Segun iti PhilHealth, saan a pudno ti ididiaya ti peke a website, ta benepisio ken serbisio medikal laeng ti ipapaay ti PhilHealth kadagiti miembrona a sakup ti "PhilHealth Konsulta."
Imbatad ti PhilHealth a saan nga agpapautang daytoy, ket pinakdaaranan ti publiko a liklikanda ti website a digido.ph.
Indagadag ti PhilHealth iti publiko nga agpannuray laeng iti pudno nga impormasion a makita iti opisial a website daytoy a philhealth.gov.ph ken iti PhilHealthOfficial iti Facebook, ken iti teamphilhealth iti Youtube ken X (Twitter). (Lizst Torres Abello/Manila Bulletin//Lito Hilidon/Bannawag)
