Tarong ti kangrunaan nga agrikultural a produkto ti Villasis, Pangasinan iti agdama ket kas pammadayaw iti daytoy kangrunaan a maimulmula ken mapaggangganaran a nateng, rinambakan dagiti taga-Villasis ti "Talong Festival" kas paset ti siam nga aldaw a piesta ti ili idi Enero 9-18, 2024.
Naangay ti street dancing competition a nangiparangan dagiti agsasalisal iti nadumaduma a sala a nakaaruatda kadagiti namaris a costume a naadaw wenno naibasar iti mula a tarong, nangruna ti bunga daytoy.
Tampok iti "Piesta ti Tarong" ti salip iti panagluto a pakaaramatan ti tarong kas kangrunaan a ramen. Aganay a 25 a potahe ti naisalip manipud iti tunggal barangay ti ili.
Ti luto dagiti taga-Barangay Unzad a rice cake eggplant ti nangabak iti umuna a premio; maikadua a premio ti fried stuffed eggplant glazed with yakiniku sauce ti Barangay Lipay, ken maikatlo ti linuto dagiti taga-Amanperez a royale bibingkang talong.
Manipud Kadagiti Agdama a Kameng ti Bannawag: Dios ti Agngina!
Iti kallabes a tawtawen, ti luto a pinakbet ti maramrambakan (babaen ti "Pinakbet sa Kawa Festival") iti Villasis, ngem tapno maiduma, ken maitandudo ti ili a kas main producer ti tarong, malaksid iti dadduma pay a nateng, naitalimudok iti tarong ti festival ita a tawen tapno, kas kinuna ni Mayor Nonato Abrenica, "marambakan ti napintas nga apit dagiti agmulmula iti tarong iti napalabas a tawen (2023)."
Segun met ken ni Councilor Crisanto Balila, gagangay a mamindua iti kada tawen nga agmula dagiti agmulmula iti tarong iti ili kabayatan ti dry season; ken ibaetbaetda met ti agmula pay iti sabali a natnateng kas iti okta, sili, ken kamatis, kasta met ti mais ken pagay.
Kaaduan kadagiti apit a tarong ken dadduma pay a nateng ti Villasis, maibibiahe a mailako iti Metro Manila; ti dadduma, mailako iti bagsakan market ti Villasis ken iti Urdaneta City Bagsakan Market. (Liwayway Yparraguirre [PNA] / Roy V. Aragon [Bannawag] / Ala ni Russel Aceveda dagiti ladawan)
