Inyalat da Johmar Rosario Alvarez ken Lito P. Hilidon ti umuna a gunggona iti salip iti daniw ken iti ababa a sarita, kas panagsaganadda, iti maika-9 a Saniata Literay Awards.

Tubo iti Ballesteros, Cagayan ken agnaed iti Ontario, Canada, pinangyalat ni Alvarez ti ummong dagiti daniwna a napauluan iti “Panangsirig Kadagiti Dakulap: Lima a Daniw ti Mennamenna.” Umawat daytoy iti premio a kuarta (PhP3,000), sertipiko, ken merch manipud iti Tianggi Ilokano.

Kakadua ni Alvarez a nangabak iti salip iti daniw da R.B. Abiva (maikadua a gunggona) babaen ti ummong ti daniwna a “Hypnos: Lima a Daniw Para ken ni Aiel,” ken Jobert M. Pacnis (maikatlo a gunggona) babaen ti ummong ti daniwna a “Rekado.” Umawat ni Abiva iti premio a kuarta (PhP2,500), sertipiko, ken merch manipud iti Tianggi Ilokano idinto nga umawat ni Pacnis iti premio a kuarta (PhP2,000), sertipiko, ken merch manipud iti Tianggi Ilokano.

Tubo iti Pangasinan ken agnaed iti Aritao, Nueva Vizcaya, pinangyalat met ni Hilidon ti ababa a saritana a napauluan “Ti Sapata.” Umawat daytoy iti premio a kuarta (PhP3,000), sertipiko, ken merch manipud iti Tianggi Ilokano.

Kakadua ni Hilidon a nangabak iti salip iti ababa a sarita da Daniel L. Nesperos (maikadua gungona) babaen ti ababa a saritana a napauluan “Gabby,” ken Glen Mae G. Dangtayan (maikatlo a gunggona) babaen ti ababa a saritana a “Waas ti Bet-ang.” Umawat ni Nesperos iti premio a kuarta (PhP2,500), sertipiko, ken merch manipud iti Tianggi Ilokano idinto nga umawat ni Dangtayan iti premio a kuarta (PhP2,000), sertipiko, ken merch manipud iti Tianggi Ilokano.

Mayawat dagiti premio bayat ti Dap-ayan 2024 ti GUMIL Filipinas.

Nagpaay a hurado iti salip iti daniw da Joel B. Manuel (pangulo), Roy V. Aragon (kameng) ken Ariel Sotelo Tabag (kameng), idinto a nagpaay a hurado iti salip iti ababa a sarita da Juan Al. Asuncion (pangulo), Roy V. Aragon (kameng), ken Ariel Sotelo Tabag (kameng).

Mainaig itoy, maipakaammo a maluktan ti Maika-10 a Saniata Literary Awards para kadagiti dua a kategoria ken mainayon ti kategoria a salip iti rebiu iti libro (book review). Agpatingga ti panagidatag iti Oktubre 4, 2024.

Isponsoran ken imatonan ti Kaamaan ni AST ti Saniata Literary Awards idinto a kukua ken imatonan ni Derick Marcel F. Yabes ti Tianggi Ilokano.