Sarindaniw ni AMADO I. YORO
(Naputar idi Setiembre 13, 1978)
Daytan ti pluma a naitugkel barukong daga ti Aloha
Dam-eg ken lamiis naitukit ti sanga
Sab-ok iti paraiso sayamusom dagiti kayanga
Iti tengnga naruay nga annak ti Ilokandia.
Nupay adu ti agkedked, adu pay ti agduadua
Dida kano bin-ig a mannurat, agngilangilda
Ngem ti allukoy, takneng-tan-ok panagkakadua
Napateg ti puso ken kararua ti Amianan a naggapuanda.
Iti sabali a bangir, adda met dagiti sigud a mannarita
Mannaniw, mannalaysay, pakaibilangan pay nobelista
Immay dagitoy a saringit, tartaraudi ni Leona
Nagtagisaing-nagtagipluma panagsurat inaronanna.
Ipagarup ti adu a tiempo ti makagapu
Napateg ti oras, balitok met ti trabaho
Ti panagbiag ditoy, yagawam ti kutitmo
Tapno saan a sayang ti panagdaliasatmo.
5 a Daniw
Ngem ti pagsasao, kannawidan di met mapagintutulngan
Napateg met ti kultura ken tradision a nabangonan
Ti pintas ken daeg sari-biag sari-ugma bukod a pagsasao iti Amianan
Laing, arte, sarindaniw, dallot-dallang, kansion, ken Bukanegan.
Kas iti GUMIL, ti gil-ayab, gumilgil-ayab, nagin-inut a rimmayray
Nagandap ti alipaga ti beggang ken tarigagay
Timmakder dagiti Ilokano, napudno panagngayangay
Daytan ti Kailokuan, Literatura Ilokana a nagsaway.
Nairusat dagiti napintas ken nataraki a gannuat
Pannakamuli, pannakapasidap agessem a mannurat
Naidiaya dagiti salisal, basingkawel iti panagsurat
Talento a nalingdan: adtoydan baro a takuat.
Timpuar abilidad patneng nga Ilokano
Saan la nga iti panagsurat, mairaman pay iti periodismo
Limtaw sirib siglat, palabra-de-onor, boses iti radio
Ti ibabangon: timon ken payak iti panagprogreso.
Nakatudo ti pluma, darikmat ken bitek
Nailansa ti parmata, rebolusion iti utek
Tiniliw-nasikogan nga idea, nagtinnagda iti manuskrito
Bukod a panirigan, ekspresion, porma, ken estilo.
Adda panawen a dumteng met dagiti dawel
Apas , apal, ken gura, agtakder a kukua a bael
Sirib ken nagan ngem iti aramidda umel
Iti angaw-piltak, marasukaw a dinnadael.
Tumakder met dagiti pudno a maipagtangsit
Ti aramidda karit-karayo, ingget-sam-it
Duri, takder, tibker-dara, ken ling-et
Literatura Ilokana iti sab-ok dagiti siit.
Dayta ti sarita a namsek padas ken panirigan
Maysa a kinapudno, napnoda iti kaipapanan
Karakterna agbibiagda lubong a paggargarawan
Siglat ken alibtak ti autor inna panangiladawan.
Ni mannaniw pinespesna ti dara ken linnaaw
Intugkelna ti pluma nagsasapalan dagiti kayaw
Naibalangat koma ti palma ken rosal iti dayaw
Ngem ti nailansa a karikatura, ay, annay, di nakagaraw!
Daydi sanga a naidugal nagrangpaya iti daga
Kas met iti bukel simmarut dam-eg lamiis-pul-oy iti Aloha
Inubon raya ti init sabong dagiti gumamela
Timmakder dagiti malalaki a mannurat, nabikagda!
Daytan dagiti nobela a nasangal, tinabid ti tanang
Ngumatngato nga arapaap, agbukardan iti kaibatogan
Gaw-atenda ti langit ken uniberso a paggargarawan
Giteb, imahinasion, pulso literatura nga umad-addang.
Inusatan ni Yoro ababa a nobela padas-pakatawa
Inurrayon ti insaruno ni Albalos adu a padasna
Ayat, inurrayon a padas ni ayat ni Ponce nakilinnumba
Idinto a sumpit-sangatukel a dara tinagibi ni Baptista.
Iti tay-ak ni dramaturgo, adu metten dagiti naipabuya
Nausatanen ti dalan, lumawlawa latta ti dana
Ti pagsiriban dumakdakkel dagiti addangna
Tapno taginayonen ti balor kultura Ilokana.
Saan a maliklikan ti kinapudno, umay latta panagtangkarangna
Ray-aw komediante wenno bulbullagaw, makapakatawa
Wenno agtibnok a sangsangit-sennaay-saning-i makalmes a lulua
Aksion, ling-i, takder-sirib drama-moro-moro makita iti bida.
Malaksid a parubroban takuat-laing ken talento
Kamkameng a managayat, managduyos nga Ilokano
Kadagiti napintek a daniw, sarita iti manuskrito
Ti pammateg iti kultura-literatura biagen dramaturgo iti entablado.
Bukanegan di met mainsasaan radio wenno entablado
Agtakderda a mangitangsit ken sidadayaw napili a topiko
Bunga ti siglat, arnis, depensa-atake, eskrima ti ulo
Ikkis ken sipsipat: Agbiag Bucaneg, Bulsek a Pedro !
Adda met imasna a pagsayaatan, aramid a pagtuladan
Kompetision, salisal, nagan pagbalinen a sanikua ken panguartaan
Ngem iti 'yanna met ngarud a pagdaksan, linnagawan sa daytan
Awitenna dayawna, adatna ngaruden kadua, agsisinakayon iti dalan.
Panaglabas ti aldaw, ti pudno a panggep kimmuyog
Saan a marsaak dagiti sabong iti dawel bagyo a maibuyog
Dagiti bunga agbalin a sabong ken bukel mataraken iti sibug
Tipkel, ideolohia, idealismo, essem, regget kumuykuyog kas sikog.
Daytoy ti Ilokano, saluyot, annak iti Amianan
Kawesda pudno a pustora anak ti Kailokuan
Kannawidan, tignay, sursuro mailasinda a di agkurang
Sao ken aramid: Kayumanggi iti kainaran.
Agtaytayyek ti sirib ken laing sangapaglangitan a tarigagay
Iti sayamusom dagiti sabong barukong daga a nagsaway
Ti naigayang a pluma ti biag limsot iti daga a timpaw
Nagan da Leona, Gabriela, Burgos, Bucaneg a natarnaw!
Daytan ti pluma a naitugkel barukong nalabaga a daga
Dagitan dagiti tartaraudi annak ti Ilokandia
Dagitan dagiti sulbod ingel ken inlili a tampipi
Nariingdan iti sab-ok daga ti kayanga a nabiag-nasudi
Dagitan ti balangatda a balligi ditoy daga ti nainitan a bikini !
(MANIPUD ITI MANNANIW: "Naisuratko dagitoy idi kalpasan a naisingasing ni Apo Juan S.P. Hidalgo Jr. nga agsuratak iti sarindaniw maipapan kadagiti agindeg iti Hawaii, aglalo dagiti Ilokano, iti kolumna a PUGON iti Bannawag idi 1975 a nangdakamatanna: 'Ni Amado Yoro ti resident poet laureate in Hawaii.'")
Magatang ti Bannawag kadagiti sukiyo nga aglaklako iti pagiwarnak ken magasin.
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
Isip pabaknangen, Bannawag ti basaen!
