Innem a kameng ti Armed Forces of the Philippines (AFP) ti napapatay, idinto nga uppat ti nadangran, iti pannakirangetda kadagiti puersa ti grupo a Dawlah Islamiyah-Maute itay Pebrero 18.
Ti puersa ti 44th Infantry Battalion ken 3rd Scout Ranger Battalion ti AFP ti nakaengkuentro ti Dawlah Islamiyah-Maute Group iti Barangay Ramain, Munai, Lanao Del Norte.
Segun ken ni AFP Chief General Romeo Brawner Jr., natay met ti dua a kameng ti Dawlah Islamiyah a mapapati a nangiwayat iti pannakabomba ti Mindanao State University (MSU) iti Siudad ti Marawi idi Disiembre 3, 2023.
Sipud Enero 25, nagtignayen ti AFP maibusor iti grupo dagiti terorista iti Lanao del Norte, a nagtungpal iti pannakatiliw dagiti 18 a kameng ti Dawlah Islamiyah-Maute Group ken iti pannakapapatay ni Khadafi Mimbesa alias "Engineer" a dauloda. (Martin Sadongdong/Manila Bulletin//Lito Hilidon/Bannawag)
