Daniw ni AMADO ILAR YORO
(Iti panagkasangay, idi Septiembre 13, 2023)
Siak, wen
Siak ti daga
Inarkosan ti lasag
Siak ti dara iti urat
Dagiti panaginaw
Ken panagluom
Insikog ti nalaus nga ayat
Iti sab-ok
Inawit ti ina
Siak ti rurog
Saan a bambanti ngem
Inasawa ti kararua
Ti panagtignay
Ken panagserbi.
Siak ti rikna
Impasngay ti utek
Masaktan ngem makaibtur
Iti awanan nagan a pannakasubok
Siak ti nakatudo a pluma
Adda agkuna, natay
Dagiti manuskrito
A nawingiwingan ti nakatugaw
Iti poder ken titulo.
Siak ti tapok, wen,
Ti tapok mailimog iti angin
Dalepdepen ti lua
Ken ling-et
Daytoy ti daga
Ti daga a namagaan
Kiddit ti pannakaawat
Natikagan a kararua.
Kinasiak met daytoy
Awitko ti krus,
Ti padeppa
A pakailansaak
Iti bitay ti pannakigasanggasat
(Saan a siak
ti old man and the sea
Ni Hemingway)
Siak: anak ti talon
A tiniltil ti rigat
Ngem kinayawan ti parmata
Siak, wen, 'toy kinanumok isu met
Ti kaipapanak a rangtay ti henerasion
Da Apong Ikko Sakada, Simeon
Dagiti nagkallautang iti kaunasan
Sirok ti init ken tudo iti Oahu: The Gathering Place
Iti “Crossroad of the Pacific”
Ken iti “Melting Pot of the Pacific”
Iti “Land of Joy and Happiness”
Ni mannurat a Mark Twain.
Urbonnak ni Apong Dapan Juan, da managdakiwas
Nga Apong Timot ti Benecia California iti sidiran
Ti Southampton ken Panorama Court
Iti Vallejo, California
Iti kasalmonan ti “Land of the Midnight Sun”
Kapadana a mangngalap iti agkatangkatang
Iti awanan ridep a taaw iti Alaska.
Kasilponak ti tugot
Ni Tata Tosong, a kunada a quack doctor...
Kasilponak ti henerasion dagiti agpagpagna
Dagiti ambisioso ken managbariw-as
Dagiti panagtawataw ken panagbirok
Ti kaibatogan a langit……
Mayarig iti kunada a Cartapilus
Dagiti managtawataw a Judio.
Ngem siak ni napeklan nga Ilokano
Managsida iti saluyot ken rabong
Patis ken bugguong; naimas latta
Ti pinakbet ken kilawen a napapaitan.
Kasilponak met ti sakada
Dagiti kayumanggi a gurong
Dagiti mangmangged iti sirok ti init
Daytoy ti rangtay: siak
Daytoy a rangtay a namagkamang
Dua nga ungto ti bullalayaw
Siak dagiti subat dagiti ar-araraw:
Kunada: Love begets Love.
Ti kari, ti ayat
Ti ayat, ti kari
Ti strong family ties.
5 a Daniw
Ngem anian, anian, anansa ta,
Daytoy a kinapiman ken kinanumo,
Apayen a kastoy, kastoy metten
Ti aplat ti biag
Saan amin a dawa ket namsek
Adda bukaw, adda eppes
Saan a maikari iti sarusar
Dagiti kaimbagan a kaarruba
Saanda a masarakan ti ridaw
Ken ti nagdissuan ti umok
Dagiti napessaan a piek, singin a piek
Kalpasan a makatayabdan
Agpatangatang iti kunada
Kinatangig.
Ngem nalagda ti pundasion
Ti adigi ken panuli
Simmalput iti punnuot
Ti kaunggan a ramut
A saan a kabaelan
A rebbaen dagiti nagballasiw a saka
Ken dapandapan dagiti naggapu
Iti talon ken kabingkolan
Idiay Santa Narcisa
Ken iti Quilquiling
Dagiti agbakbaklay ginantong
A danum, angot-bawang, lasona
Ken tabako iti bangkag ken kainaran.
Siak met ti pannakasubok
Ti sabali a panagbangon
Ti panagbalbaliw ken panagdaliasat
Dagiti adu a nagkurosan ti dalan
Adda dagiti agintutuleng, kas met
Dagiti agimbubulsek
Kalpasan ti panagsagrap
Iti ganas ken sam-it ti diro
Ken imnas ti mansanas a nagganasanda
A kinirabkirab
Dagiti nabisinan
Dagiti pammedped ti waw
Ti bisin, ti apas
Ti apal
Iti awan naganna
A panangumsi ken panangtallikud ta naibusen
Ti anag ti asin a nakipagsepsepanda
Iti rekado ti biag.
Nawatiwat ken awan ti sigurado
Iti riniwriw a pannubok
Ngem adtoyak: bakruyek dagitoy
A pannubok
Ditoyak iti kainaran iti sirok
ti sumsumged nga init
ditoy desierto a siudad
iti sab-ok ti Sin City
No ania ti patinggana
Umayto ti uged ti panawen.
Siak ken ti pakasaritaak
Ikuyogto ti pakaikarianna
A kaibatogan.
Magatang ti Bannawag kadagiti sukiyo nga aglaklako iti pagiwarnak ken magasin.
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMag
