6-Bannawag

Innem a Daniw ni HONOR BLANCO CABIE

1
ania ketdin kinapaidamna
daydiay panagtutunos tao 'ti
rabaw karkaramutan a daga.

ukraine ken gaza* ken sadinnod'ta
alla, agkakamakam dagiti
mangted daras panagkiet karkarma.

'ti yellow sea ken taiwan strait** adda
sadiay bumangbang-esda a buli,
sagitsitda isut' makarapa.

'ti abagatan met a daya*** ta
bapor ti tsina, ay! di agpakni,
mangrasion a bapor kil-aganda.

masalsaludsodko ngata adda
pay 'tay bigat pakasukdalan ti
kinnaawatan ken daytay kappia?

ania ketdin kinapaidamna
daydiay panagtutunos tao 'ti
rabaw karkaramutan a daga.
awan san, 'tanud, 'tay ingganana.

*'diay ukraine, sinerrek dagiti tropa
ti russia idi peb 24, 2022; 'diay gaza
strip, madama ti ranget dagiti soldado
nga israeli ken dagiti hamas a militante.
**iti yellow sea, iti nagbaetan ti tsina ken
korean peninsula, nairteng ti susik dagiti
dua a korea; idinto nga iti taiwan strait,
masansan ti panangbutbuteng ti dakdakkel
a tsina, nga agkunkuna a kukuana ti taiwan.
***iti west philippine sea, kukua ti filipinas kas
paset ti bukodna nga exclusive economic zone
(320 kilometro manipud iti baybayna), sasaeden
dagiti intsik a bapor (coast guard) dagiti filipino
nga agkalkalap ken dagiti mano la a bapor a
mapan mangrasion kadagiti filipino 'diay
ayungin shoal.

2
inna ken babbaket pati ubbing
aduda nga aglemmeng agtaray,
tumapuakda 'ti bukod a diding.

iti panagtarayda maisarming
pasamakda – anian kinaliday –
bay-andan no isudat' karriing.

aglawlawda agkakamakam sing
sing bang bang sing bang sing awan sarday,
iti taaw bumatok 'tay pating.

dapan naut-ot ngem agkingkingking
inna ken babbaket, ub-ubbing 'diay
ubba-ubbada nga agbangbangking.

mabaddebaddekandat' pandiling
ngem dida a pulos ikaso 'diay
pannakatartarantada't bang sing.

inna ken babbaket pati ubbing
aduda nga aglemmeng agtaray,
tumapuakda't saripda a diding –
mangkeltay a gubat maisarsarming.

3
kataltalonan surong ken sang-at,
kuamponso ken tamorong, suyo pay,
inikkandat' matak panagrimat.

'ti sirok init no dumteng bigat
ken no dumteng metten malem sadiay
mayat panagtakder, panaginnat.

'diay bukod a kakellengan ta siak
awan sardayna a mamurmuray,
adda't barukongko daytay ragsak.

kanayon a kaduak 'toy karkarmak
no addaak 'diay sidiran ti bantay
a magmagna kadagiti tambak.

addaak man siudad itan, ay! siak
guyoden 'tay lagip mapan sadiay
nakaikalian bugtong a kadkaduak.

kataltalonan surong ken sang-at,
kuamponso ken tamorong, suyo pay,
inikkandat' matak panagrimat:
isuda 'tay pamigsa 'toy urat.

4
masansan a sumken 'toy iliwko
a magmagna koma't lugar innak
dinakkelan – daydiay ti lubongko.

sadiay a namulit' panunotko,
nakaibitinan 'toy panagragsak,
paraiso dagiti dadakkelko.

sadiay natenneb pay ti mugingko
tapno maridridis panagamak,
dadduma sumsumrek barukongko.

sadiay pay a lugar kakabsatko
ida kaduak a nagsakruy ragsak:
ar-arapaapmi imburnayko.

'toy iliwko gaboennat' mugingko,
ay! siak madalupo, maitubtublak,
anian pigsa, kidser 'toy iliwko.

'toy iliwko, atanud, iliwko
pagaruyotenna't daras 'toy luak:
sapulek aminda dadakkelko
agraman dagiti kakabsatko.

5
iti nangato a pasdek iti
siudad, lugar innak pagkalkalian
karot, kamangeg iggemkot' kari.

sadiay abutannak ti rabii,
no 'tay agawidak 'diay pagnaan
nawasnay kurangko lat' agdir-i.

kayatko iggaman koma iti
sakbay panagsipnget daytay napan
tangatang, wen, sakbay ti rabii.

idi addaak pay probinsia ti
ragragsakko no initen mapan
'ti laud a sumreken 'diay sipi.

sapsappuyotek init no idi
agal-allinen 'ti pagpagnaan,
mapanen paraangan rabii.

ita adda lidayko ta iti
essem 'diay init iggamak awan
pulos a maarikapko no di
agkirkirem a silaw panggedan.

6
anian kinadawelnat' iliwko
sinawangna dagdagus 'toy matak,
saankon a natambakan 'toy luak
daras a nanglayus 'toy lubongko.
dadakkelko, kakabsatko ida
ni maysa ta awan man la daytay
umadani mangep-ep 'toy liday,
mangagas 'toy pannakaraprapa.

nagasatda, ni maysa ta awan
makailadawan kinaranggasna
'toy iliw a sumalsalugsog, ay!
awanda't katigid ken kanawan.
ti lubongko kaduak 'toy karkarma,
ay! ngem pati isu malidliday.

Magatang ti Bannawag kadagiti sukiyo nga aglaklako iti pagiwarnak ken magasin.

Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.

Mabalin pay a magatang ti Bannawag iti

Shopee: http://bit.ly/Bannawag-Shopee

Lazada: http://bit.ly/Bannawag-Lazada

Para iti digital a kopia:

PressReader: http://bit.ly/3n83kNQ

Magzter: http://bit.ly/407pazG

Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph

Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,

iti Instagram: https://www.instagram.com/bannawagmagazine

iti Twitter: https://twitter.com/BannawagMagasin

Facebook Page: https://www.facebook.com/BannawagMagasin

Facebook Public Group: https://www.facebook.com/groups/bannawag.magazine