Kas insalaysay ni SILVERIO L. CALULOT SR. ken ni LITO P. HILIDON
AGTAWENAK laeng iti innem idi damok ti makaiggem iti Bannawag. Naglaklako iti Bannawag ti ulitegko iti Bambang (Nueva Vizcaya) idi, ket siak ti baonenna a mapan agisursor. Ket gapu ta Bannawag met laeng ti itangdanna kaniak, inkaubingak ti nagbasbasa iti Bannawag. No makalakoakon, itedna metten ti tangdanko ket ugmokak metten nga uk-ukagen. Diak pay ammo ti agbasa idi ngem magustuakon ti magasin. Ti benneg ti komiks ti umuna nga ukagek. Da Hagibis ken Kenkoy ti kaay-ayok a buyaen. Babaen met laeng ti Bannawag, nasursurok ti agbasa a bukbukodko. Sakbay a simrekak iti Grade One, makabasaakon a natarus iti Ilokano.
Saankon a liniwayan a basaen ti Bannawag agingga a dimmakkelak. Magusgustuak dagiti sinurat daydi Apo Hermogenes Belen kas iti nobelana a “Dagiti Balud” a maipapan iti panaglalaban dagiti Hapones ken dagiti gerilia a Filipino idi gubat. Padpadaanak met ti tunggal paset ti nobela a “Ti Pagbutbutngan ti Sierra Madre” a sinurat ni Nemesio Caravana. Magustuak unay ti lubong ti kinadatdatlag a pagbibiagan dagiti karkarna a tattao ken pinarsua iti nasao a nobela. Dagitoy ti nakatignayak a nagputar met kadagiti sarita nga impatpatulodko iti Bannawag. Ngem awan ti napagasatan idi. Saanak ketdi a naupay. Pinadasko pay ti salaysay. Sinuratko ti diakto malipatan a padasko—ti pannakaaksidentemi iti lugan idiay ili ti Bagabag idi Mayo 24, 1958 a nakadunorak iti nakaro (nai-confine-ak iti ospital idiay Bayombong iti 25 nga aldaw). Naipablaak daytoy iti benneg a “Tao, Lugar, Pasamak” iti Marso 4, 1963 a bilang ti Bannawag.
Nupay nagbasbasaak latta iti Bannawag ken agsuratsurat sagpaminsan, saankon a nasunotan ti nagipatulod iti Bannawag ta nakumikomak idin iti panagbiagmi iti pamiliak. Idi 1982, nakigasanggasatak iti Estados Unidos tapno maitakderko ti dumakdakkel a pamiliak ket mapagturposko dagiti annakmi iti kaingungotko. Idi damo a napanak idiay Seattle, Washington, nagtrabahoak iti maysa a farm; nagmulmulakami iti natnateng a naggapu ti bin-ina iti Filipinas. Mailako ti apitmi kangrunaan kadagiti Asian store.
Nagawidak iti Filipinas kalpasan iti tallo a tawen. Ngem nagsubliak met laeng idiay Washington idi 1987 ket nagobraak a kas caregiver agingga iti 2017. Kaasi ti Apo, napagturposko amin nga annakmi. Nagawidakon iti Filipinas kalpasan a naalak iti America ken napagturposko sadiay iti kurso a Nursing ti buridekmi a ni Silverio Jr., nga agtrabtrabaho itan iti maysa nga opisina ti pension claims idiay Lihue, Hawaii.
Adda naminsan a sinarungkarak ti buridekmi iti Lihue. Iti maysa a public library sadiay, nakakitaak iti section a nailatang a para laeng iti Bannawag. Napidipid iti estante iti nagadu a Bannawag a naurnos segun iti tawen. Anian a siddaaw ken ragsakko, kasla maysaak nga ubing a maay-ayatan a nakakita iti nakakaskasdaaw a banag ta pagammuan la ta adda metten Bannawag iti sanguanak. Kasla maysa a tagainep! Kas man nakapanak iti lubong ti kinadatdatlag a nabasbasak idi iti nobela ni Apo Caravana. Siraragsakak a nagala ken nagukag. Siiliwak a nagbasa. Malagipko ti kinaubingko, ti panaglaklakok iti Bannawag idiay Bambang, ti inkakaubingak a panagduyos nga agbasa iti daytoy a magasin nga Ilokano. Nalagipko met ti arapaapko idi nga agbalin met a mannurat ti Bannawag. Saanakon a nakatalna ket binulodko dagiti daan a Bannawag a diak nabasbasa kadagiti tawen nga addaak idiay Washington. Nagbalin a kasla eskuelakon ti library ta dandani inaldaw a mapanak. No isublikon dagiti binulodko, mangalaak manen iti yawidko a basbasaen iti balay ti anakko. Kasla kayatko a kamakamen dagiti napalabsak a bilang ti Bannawag iti las-ud ti nasurok a duapulo a tawen.
Addan appokok iti tumeng, ngem diak latta maliwayan ti agbasa iti Bannawag. Umdas a paglinglingayanmi ken ti kaingungotko, ken subsublaten met a basaen dagiti appokok. --O
(Agnanaed ni Apo Silverio Calulot Sr. ken ti pamiliana iti Bone North, Aritao, Nueva Vizcaya. Nayanak ken nagubing idiay San Antonio, Bambang, Nueva Vizcaya.)
Magatang ti Bannawag kadagiti sukiyo nga aglaklako iti pagiwarnak ken magasin.
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
Isip pabaknangen, Bannawag ti basaen!
