Pinirmaan ita (Pebrero 26) ni Presidente Ferdinand "Bongbong" Marcos, Jr. ti dua a paglintegan a mangraem ken mangitunda iti panagrang-ay dagiti dua a sektor ti kagimongan -- ti Tatak Pinoy (Proudly Filipino) Act ken ti Expanded Centenarians Act.
Ti Republic Act (RA) No. 11981, wenno Tatak Pinoy (Proudly Filipino) Act, ti manamnama a mangparegta ken mangtagibi kadagiti napipintas a partuat, serbisio, wenno produkto ti Filipino.
Ti RA 11982, wenno ti Expanded Centenarians Act, ti mangpasaknap iti sakupen ti Centenarians Act ket mangipaay iti PhP10,000 a cash gift kadagiti Filipino a makagteng iti tawenda a 80; idinto nga agtultuloy a maikkan iti PhP100,000 dagiti makagteng iti tawen a 100.
Segun ken ni Communications Secretary Cheloy Garafil, tallo a paglintegan koma ti pirmaan ti Presidente ita, ngem naitantan ti pannakapirma iti Magna Carta for Filipino Seafarers Act ta mareprepaso pay laeng daytoy. (Argyll Cyrus Geducos/Manila Bulletin//Lito Hilidon/Bannawag)
