Rinugianen ni Department of Finance (DOF) Secretary Ralph G. Recto a sarungkaran ti maar-aramid a Metro Manila Subway iti Siudad ti Valenzuela itay Pebrero 26.
Ti Metro Manila Subway ti kaunaan a subway (wenno riles iti uneg ti daga) iti Filipinas ken maikatlo a kadakkelan a proyekto babaen ti Build Better More a programa ni Presidente Marcos, Jr.
Malaksid iti 17 nga estasion a mamagsilpo iti Siudad ti Valenzuela ken Pasay, maipatakder pay ti 30-ektaria a pannakabodega a pagianan dagiti tren.
Segun iti DOF, PhP488.5 a bilion ti kasapulan a pondo; idinto a PhP370.7-bilion ti ipautang ti Japan International Cooperation Agency (JICA) babaen ti official development assistance (ODA), ket PhP117.7-bilion ti aggapu ti Filipinas.
Manipud Kadagiti Agdama a Kameng ti Bannawag: Dios ti Agngina!
Manamnama a malpas inton 2029, agbalinton a 35 a minuto laeng ti biahe manipud Valenzuela agingga iti Ninoy Aquino International Airport (NAIA) ken pagnumaran dagiti 519,000 a pasahero iti inaldaw. (Chino S. Leyco/Manila Bulletin//Lito Hilidon/Bannawag)
