Imbilin ni Presidente Ferdinand "Bongbong" Marcos Jr. ita (Pebrero 27) ti pannakaitipon ti teknikal-bokasional a kurso iti kurikulum ti Senior High School (SHS) tapno nalaka a makasapul iti pagtrabahuan dagiti agturpos iti SHS iti ballasiw-taaw.
Binilin ni Presidente Marcos, Jr. dagiti maseknan nga ahensia ti gobierno a maitipon ti Technical and Vocational Education and Training iti Senior High School curriculum tapno mapunnuan ti kasapulan dagiti pagtrabahuan.
Mabukel ti maysa a technical working group a mangsangal iti kurikulum a pagkamengan ti Technical Education and Skills Development Authority (TESDA), Department of Education (DepEd), Commission on Higher Education (CHED), ken ti Department of Labor and Employment (DOLE).
Maibatay iti panagsukisok ti Philippine Institute for Development Studies (PIDS), adu ti kasapulan a mangmangged ngem iti teknikal-bokasional a tay-ak. Nupay kasta, saan a makastrek iti trabaho dagiti nagturpos iti SHS ta agkurangda pay laeng iti kabaelan iti nasao a tay-ak.
TURISMO: Intayon Idiay Ayuyang Garden iti Pila, Siudad ti Laoag!
Segun ken ni TESDA Deputy Director General Rosanna Urdaneta a saan a napaay ti K-12 ngem adda laeng nagkapuyan daytoy a nasken a maatur.
Inlawlawag ni TESDA Secretary Suharto Mangudadatu a saan a pakarikutan dagiti mannursuro ti napagtipon a kurikulum, idinto a saan met a dakkel ti pagbaliwan daytoy, ngem maipangpangruna laeng dagiti teknikal nga aspekto kadagiti nasken a masusuro dagiti SHS.
Kinuna pay ni Urdaneta a babaen ti panagtipon ti teknikal-bokasional a kurso iti kurikulum ti SHS maikkan iti diploma ken national certificate dagiti agturpos iti SHS; iti kasta, dakdakkel ti gundawayda a makastrek iti panggedan.(Betheena Unite/Manila Bulletin//Lito Hilidon/Bannawag)
