Imballaag ti Philippine Atmospheric, Geophysical, and Astronomical Services Administration (PAGASA) itay Pebrero 27 ti agtultuloy a panagbaba ti danum dagiti dam iti Luzon iti mapasungad a bulan gapu iti El Niño phenomenon.
Imbatad ti PAGASA iti National El Niño Forum and the 169th Climate Outlook Forum nga agtultuloy ti panagbaba ti danum iti walo a dadakkel a dam iti Luzon.
Wanwanawanan ti PAGASA ti panagbaba ti danum dagiti dam iti Luzon kas iti Angat Dam (Bulacan), Ipo Dam (Bulacan), La Mesa Dam (Quezon City), Ambuklao Dam (Benguet), Binga Dam (Benguet), San Roque Dam (Pangasinan), Pantabangan Dam (Nueva Ecija), ken ti Magat Dam (Isabela).
Iti datos ti PAGASA, addan iti 206.35 a metro (m) ti reservoir water level (RWL) ti Angat Dam, idinto a 212-metro ti normal high water level (NHWL) daytoy. Ti Angat Dam ti kangrunaan a paggapuan ti danum iti Metro Manila.
Manipud Kadagiti Agdama a Kameng ti Bannawag: Dios ti Agngina!
Inlawlawag ni PAGASA-Hydrometeorology Division weather facilities specialist Edgar Dela Cruz a mabalin a bumaba pay ti danum ti Angat Dam iti 193.32 a metro iti arinunos ti Marso, ngem uray nababbaba ti danumna iti NHWL, agtalinaed latta daytoy iti 190.40-metro.
Innayon pay ni Dela Cruz a mabalin a bumaba iti 228.24-m ti danum iti San Roque Dam; ken 178.38-m iti Pantabangan Dam iti arinunos ti Marso.
Kinuna ni Dela Cruz a nupay bumabbaba ti danum kadagitoy a dam, umdas latta ti danum a mangpataray iti daytoy.
Inanamaen ti PAGASA a manayonan ti danum dagiti dam iti Luzon iti bulan ti Hulio ken Agosto a panawen ti bagyo. (Ellalyn De Vera-Ruiz/Manila Bulletin//Lito Hilidon/Bannawag)
