Indagadag ni Presidente Ferdinand Marcos, Jr. ken ni Pastor Apollo Quiboloy nga agparang daytoy ket sungbatanna dagiti saludsod mainaig iti pammabasol kenkuana.
Imbalakad ni Presidente Marcos iti dadaulo ti Kingdom of Jesus Christ (KJC) a ti panagsaona iti Kamara ken Senado ti kasayaatan a mangpabaaw iti situasion.
Segun iti Presidente, amangan no kumaro ti situasion no maibalud ni Quiboloy gapu iti dina itatabuno iti imbestigasion ti Kamara ken Senado.
Iti maysa a video, kinuna ni Quiboloy a kayat kano ti Estados Unidos a papatayen isuna.
Manipud Kadagiti Agdama a Kameng ti Bannawag: Dios ti Agngina!
Ngem kinuna ni Presidente Marcos nga awan ti agganggandat a mangpapatay ken ni Quiboloy, idinto a naipila dagiti kaso maibusor kenkuana iti Estados Unidos sakbay a nagtugaw ni Marcos a kas Presidente.
Nagbalin a wanted ni Quiboloy iti Federal Bureau Investigation (FBI) gapu iti kaso a labor trafficking scheme, sex trafficking, fraud, kdp. iti Estados Unidos a nangipaulog iti federal warrant of arrest para iti pannakatiliwna idi Nobiembre 2021.
Pinaayaban ti Senado ni Quiboloy gapu iti alegasion a panangramesna kadagiti dadduma a pasurotna; idinto a palpalutpoten ti Kamara dagiti pammabasol a pananglabsing ti SMNI iti prangkisa daytoy. (Betheena Unite/Manila Bulletin//Lito Hilidon/Bannawag)
