Ni ALFREDO ELVEÑA VERZOSA
Inangay ti nakaikamengak nga Elveña Clan ti maikadua a panagtitiponmi manen (reunion) nga agkakabagian idi Pebrero 4, 2024 iti Tayum, Abra. Immuna nag-reunion-kami idi 2015 ket dimmar-ay dagiti kakabagianmi manipud Visayas ken Mindanao ken dagiti adda iti ballasiw-taaw. Adukami a dimmar-ay a taga-Tayum ta ditoy nga ili ti nakayanakan dagiti appomi a lallakay. Immay met dagiti kakabagianmi manipud iti kabangibang nga il-ili ti Abra. Nasurok a 100 ti immatendar.
Ni Joselito “Ambo” Elveña a nakabase idiay Taiwan ken Manang Yoly Elveña Stephens ti United Kingdom dagiti nangruna a nangorganisa iti daytoy a reunion babaen ti panagtitinnulong ken pannakikaykaysa dagiti kakabagian nga Elveña. Kangrunaan a ‘nagsasarak’ ken nagpapatanganmi ti pannakaangay ti reunion babaen ti social media. Ni Manang Margie Elveña Labuac a naggapu idiay Samar ti nagserbi a pannaka-accountant ti grupo a nagorganisar iti reunion, idinto a ni kaanakanmi a Ryan Elveña Montecillo ti Manila ti nakaammo a nangyimprenta kadagiti T-shirt ken tarpaulin a dinisenio ‘toy numo.
Narugian ti panagtitipon babaen ti pannakimisa ti grupo iti simbaan iti dayta a Domingo. Dakami ti akimbatang a nagidaton iti offertory. Kalpasan ti misa, naisaruno ti atiddog a motorcade a nangrugi iti plasa ti Tayum a nagpadaya iti highway, sa nagpaabagatan iti nagbedngan ti Tayum ken Bangued, sa nagbuelta a nagpaamianan iti katengngaan ti ili ket nalabsan dagiti barangay ti Patucannay, Cabaroan, Poblacion, Deet, Gaddani, ken Bumagcat sa nagsubli a nagturong iti pakaangayan ti reunion: iti Farmview Inn iti Sitio Guingad, Brgy. Gaddani, a kukua ken imatmatonan ti kapiduami a retirado a heneral, ni Rogelio “Binnong” Elveña, dati a probinsial direktor ti Philippine National Police ti Abra ken dati a mayor ti Tayum. Nasurok a maysa nga ektaria a minuyongan ti farm nga addaan kompleto a pasilidad kas iti otel, gazebo, nalawa a hardin, ken function hall.
Ni Manang Aniflor Elveña David a naggapu pay idiay Amerika ti nangidaulo iti lualo a kas panangirugi iti programa. Da met agassawa a Naty Elveña Amorin ken Jovito “Jovy” Amorin, a naggapu idiay London, dagiti nagpaay nga emcee kabayatan ti nagmalmalem a programa.
Rod Lofamia, dibuhista ti Bannawag, 79
Iti programa, naipresentar ti kaputotan ni Severino C. Elveña ken ti asawana, ni Josefa Nolledo. Isuda dagiti nagannak kada Lolo Gavino, Cornelio, Benito, Vicente, Hipolito, Braulio, Silvino, ken Lola Canuta. Tunggal maysa kadagiti lolo ken lola, adda nangibagi iti kaputotanda.
Imbagiak ni Lolo Vicente ken Lola Felisa Pe Benito nga asawana, nga addaan iti 8 nga annak a pakaibilangan daydi nanangko nga Amelia nga inaunaan. Innaganak ti tunggal maysa kadakami a 14 nga agkakabsat ken ti dakami nga ag-50 nga agkakasinsin nga appoko da Lolo Vicente ken Lola Felisa. Saankon a mabilang ti kaadu ti appokoda iti dapan ken tumeng agraman dagiti naikappon a mamanugang.
Ni Uliteg Baddo Elveña Buentipo nga anak daydi Lola Canuta ti panglakayen ken kakaisuna nga ulitegmi a nakadar-ay.
Naibaetbaet ti kankanta, salsala, ken pannakipatpatang dagiti dadduma a kakabagian nga ita laeng a makitami. Kalpasan ti pangngaldaw a nakaidasaran ti nabuslon a taraon, narugian ti naragsak ken pagkakatawaan a parlor games a sinaruno ti makapagagar a raffle draw ti adu a regregalo (appliances a kaaduanna ti mausar iti kosina, cash gift, ken sinaksako a bagas). Adda pay libre a pa-ice cream ni Manang Yoly, ‘sinaedda’ ‘tay aglaklako iti sorbetes iti asideg a kalsada. Indauluan met da Ambo ken Jovy ti panagbayo iti lubilubi babaen ti kadaanan nga al-o ken alsong a kinankantaan ken sinalsalaan dagiti nataengan a babbai.
Ti naudi a paset ti programa kalpasan ti group picture ket ti ceremonial tree planting nga indauluan da Manong Binnong ken ti adingna a dati a kapitan ti Barangay Poblacion, ni retirado Mariner Romulo "Mulong" Alagao Elveña, nga isu payen ti napili a mangidaulo iti sumaruno a reunion ti Elveña Clan. --O
Magatang ti Bannawag kadagiti sukiyo nga aglaklako iti pagiwarnak ken magasin.
Para iti subskripsion, ag-email iti [email protected]. Para iti dadduma pay a detalye, kontaken ti Circulation Department iti 8527-8121 Loc. 369, wenno iti CP No. 09567620852.
Mabalin pay a magatang ti Bannawag iti
Shopee: http://bit.ly/Bannawag-Shopee
Lazada: http://bit.ly/Bannawag-Lazada
Para iti digital a kopia:
PressReader: http://bit.ly/3n83kNQ
Magzter: http://bit.ly/407pazG
Para kadagiti kompleto a sarita, nobela, daniw, salaysay ken dadduma pay, bisitaen ti opisial a website ti Bannawag iti https://bannawag.ph
Laglagipenyo koma met, kakailian, nga ag-join/i-follow (ka)dagiti official a social media account/page/group ti Bannawag,
iti Instagram: https://www.instagram.com/bannawagmagazine
iti Twitter: https://twitter.com/BannawagMagasin
Facebook Page: https://www.facebook.com/BannawagMagasin
Facebook Public Group: https://www.facebook.com/groups/bannawag.magazine
Dios ti agngina.
Isip pabaknangen, Bannawag ti basaen!
